CEBU, Philippines - Mirampa ang Cebuana nga si Charlea Lagaras ug ang iyang dance partner nga si Ronnie Steve Vergara kinsa midaog sa 2009 Cebu IDSF World DanceSport Open Latin and Standard sa 4th DanceSport sa Sugbu niadtong miaging adlaw diha sa Cebu City Hotel and Casino Grand Ballroom.
Wala magpapugong sila si Lagaras ug Vergara sa pagpakita sa ilang abilidad aron masakmit ang premier adult A-closed Asia ug IDSF Open titles event batok sa mga dekalibreng dancesport team sa kalibutan.
Lakip sa mga gipukan nila ni Lagaras ug Vergara mao ang laing Cebuano tandem nila ni
Dearlie Gerodias ug John Errole Melencio nga mipahiluna sa second place sa closed Asia category, samtang sila si Norwille Damasin ug Joana Niña Marciano mipwesto sa third place
Nipatigbabaw usab sila si Lagaras ug Vergara batok sa mga Bulgarians nga sila si Petrov Genadi ug Ilieva Vanina sa IDSF Open, samtang sila si Gerodias ug Melencio mitungtung sa third place.
Sa modern standard premier class, ang pambato sa Hongkong nga sila si Faye Hung ug Pietro Del Bello maoy nisakmit sa gold batok sa crowd-darling nga sila si Stela Kukonova ug German Tepavicharov, samtang ang koponan gikan sa China nga sila si Yuan Cheng Jun ug Su Na mipahiluna sa third place.
Bisan paman og gidominaran sa mga banyaga ang IDSF Open, ang mga Pinoy usab ang nangharus sa closed Asia events human manghawud sila si Jaime Sarmiento ug Maria Cristina Nguyen, gisundan nila ni Karla ug Brian Ocaña ug Ana ug Joel Madera tandem.
Sa latin event, sila si Jed Villaruel ug Maria Ellen Delos Reyes maoy milangkat kampiyonato sa sa tulo ka classes nga naglakip sa adult D batok sa Sexbomb dancer Cherryl “Che-che” Tolentino ug Gisbert Igaya. Ang tandem nila ni Villaruel ug Delos Reyes mao usab ang kampiyon sa pro-am 1 ug teacher-student action.
Sa ilang bahin, nagpabiling walay pilde ang laing Cebuana nga si Mae Lozada ug Anselm Estillore sa B class, samtang sila Reid Beradas ug Victoria Lleno may kampiyon sa adult E. Si Lleno nakig-uban usab ni Reyma Barris aron malangkat ang titulo sa adult class C. - Lemuel P. Maglinte (BANAT NEWS)