CEBU, Philippines - Gipakita ni WBO Intercontinental super bantamweight champion Ramie Laput ang iyang abilidad aron paglansang og daog pinaagi sa unanimous decision batok ni Eric Macas first edition sa “Friday Night Live Boxing” niadtong miaging gabii diha sa New Cebu Coliseum.
Ang rank No. 4 sa World Boxing Organization nga si Laput maoy nakabentaha sa maong away gamit ang iyang abilidad sa counter-punching aron mopatigbabaw batok ni Macas.
Human sa 10 ka hugna nga binukbukay, tulo ka mga hurado ang mi-iskor og 97-93, 97-93 ug 99-91 pabor ngadto ni Laput.
Sa laing bahin, si Fernando Lumacad mikulit sab og daog pinaagi gihapon sa unanimous decision batok ni Niño Suelo, kinsa mibarag sa eight round human maigo sa makusog nga walang suntok ni Lumacad. Ang iskor, 96-94, 96-94 ug 98-92 pabor ngadto ni Lumacad.
Wala usab mag-usik og panahon si Ariel Barotillo ug dali niyang gihuman ang away human niya gipakatug ibabaw sa ring si Joy Pol sa second round. Bisan pa man og gididakan siya og uno punto sa first round tungod sa pag-head-butt, si Barotillo nagmangtas ug iyang gitumba si Pol sa second round oras nga 2:12.
Gi-TKO usab ni featherweight prospect Jose Campo si Jomar Labiogo sa ikatulong round, si Edward Penerio mipukan usab ni John Rey Cañete pinaagi sa second round knockout sa light flyweight division, samtang si Ivan Soriano mipatikangkang ni Ronell Sosa sa second round sa light flyweight division.
Mipatigbabaw sab si Anthony “Zorro” Sabalde batok ni Bernard Salisinas pinaagi sa 4th round TKO ug si Jerwin Ancajas midaog pinaagi sa majority decision batok ni Jayme Papa.
Ang maong boxing event gipasiugdahan sa SGG Promotions ni Sammy G. Gello-ani.
(Lemuel P. Maglinte) BANAT NEWS