Pages, Acuña nanghawod sa 1st Press Freedom Run

CEBU, Philippines - Gidominar nila ni John Pages ug ni Atty. Haide Acuña ang tagsa-tagsa nila ka dibisyon sa labing unang Press Freedom Run nga kabahin sa kasaulogan sa 15th Cebu Press Freedom Week, kagahapon diha sa Cebu Business Park.

Si Pages, ang presidente sa Sportswriters Association of Cebu (SAC) ug sports columnist sa SunStar maoy nanghawod sa 5K men's division human niya gitapos ang lumba sulod sa 21:51.20, gisundan ni Edri Aznar sa SunStar nga mi-oras og 23:49.01 ug Jorlito Montecillo sa Wild FM sa oras nga 24:04.00 alang sa ikaduha ug ikatulo nga dapit.

Ang maong lumba magsilbeng tune-up race ni Pages agi'g pagpangandam sa Quezon City International Marathon sunod bulan ug Standard Chartered Marathon didto sa Singapore karong Disyembre.

Sa iyang bahin, ang anchor sa TV Patrol sa ABS-CBN Cebu nga si Acuña, mihuman sa lumba sud sa oras nga 27:12.37 aron tahuron isip hara sa 5K women's division.

Si Marlen Limpag sa Sun Star (29:30.23) ug Charmy Sabigan sa Bombo Radyo maoy miangkon sa ikaduha ug ikatulo nga dapit.

Gawas sa mga medalya, sila si Pages ug Acuña mibulsa sab og P2,500, ang second ug third placers sa matag dibisyon mibulsa og P1,500 ug P1,000 matag usa.

Sa laing bahin, sila si Jun Migallen ug Irenelou Llego sa SunStar maoy nangharos sa 3K division. Gitapos ni Melligen ang lumba sa oras nga 15:40.89, gisundan nila ni Ike Durano sa DYRF (17:16.56) ug Ariel Gomez sa CDN (17:46.51).

Samtang si Llego mitapos sa lumba sa oras nga 15:40.70 uban nila ni Maridel Cresencio sa DYRF (18:17.12) ug Jovy Gerodias sa Sunstar (22:48.90) sa second ug third place. (Lemuel P. Maglinte) BANAT NEWS