Lady Stags, Lady Knights lumapit sa semis

MANILA, Philippines - Sa women’s volleyball, kinamkam ang panalo sa magkahiwalay na asignatura, namayani ang kapangyarihan ng defending champion na San Sebastian at Letran nang padapain ang Angeles U Foundation at Arellano U Lady Chiefs para lumapit sa semifinal berth ng women’s division ng 85th NCAA volleyball tournament sa Emilio Aguinaldo College Gym.

Humampas para sa 25-14, 25-10, 25-13, napaganda ng San Sebastian belles ang kanilang baraha, habang nailusot naman ng Lady Knights ang isang dikdikang laban nang tapusin ang kalaban sa pamamagitan ng 25-15, 25-23, 25-23 para kapwa makisosyo sa four way logjam sa tuktok kasama ang Perpetual Help at St. Benilde.

Sa men’s division, naipag-higanti ng Arellano ang mga kabatak na babae nang ilampaso ang Letran, 27-25, 15-25, 25-12 para ilagay ang Knights sa bingit ng alanganin dahil sa taglay na 2-4 kartada.

Ang aksyon naman sa juniors ay patuloy na umiinit nang durugin ng reigning champion San Sebastian ang AUF, 25-20, 17-25, 19-25, 20-18 upang humanay sa Perpetual Help na may perpektong baraha habang tinalo rin ng Letran ang Arellano 25-18, 25-9, 25-3. (SNF)