CEBU, Philippines - Wala moila og mangtas ang University of San Jose-Recoletos (USJ-R) Baby Jaguars human nila malupigi sa kusog ang University of Southern Philippines Foundation (USPF) Baby Panthers aron pagdagit sa 82-78 nga kadaugan atol sa ilang bugno kagahapon sa nagpadayong 9th Cebu Schools Athletic Foundation Inc. (CESAFI) basketball event diha sa Cebu Coliseum.
Ang Baby Jaguars nabiyaan og 13 puntos sa makaduha ka higayon sa halftime, 43-30 ug sa nanghinapos nga bahin sa ikatulong kuwarter, 51-38. Apan ang malditong Baby Jaguars hinay-hinay nga mikitkit sa labaw ug hangtod nga nakatabla kini, 65-all human sa split charities ni June Arthur Go sa tunga-tungang bahin sa final period.
Katapusang nakatilaw og labaw ang Baby Panthers sa iskor nga 69-67 kortesiya ni Joshua Corilles kay daling napatabla og balik ni Renzo Senining ang duwa pinaagi sa iyang duha ka free throws, 69-all. Human magtabla, si Arlister Escatron mikompleto sa iyang three-point play aron lawgan ang Baby Jaguars og tres puntos nga bentaha, 72-69 sa nahabiling 3:50 sa duwa. Sukad niadto, kontrolado sa Baby Jaguars ang nahabiling mga oras sa duwa.
Ang Baby Jaguars nga nagtangag og 3-4 win-loss record gibidahan ni Clint Muñez, kinsa mibahog og 31 puntos, samtang si Venjie Trozo milawog og 18 puntos.
Ang naparot nga Baby Panthers gipangulohan sab ni Joshua Corilles pinaagi sa iyang 25 puntos. Laing tulo ang mi-iskor og double figures alang sa Baby Panthers, kinsa nagtangag og 1-5 nga baraha.
Puntos Matag Usa
USJ-R (82) - Muñez 31, Trozo 18, Autentico 8, Go 8, Escatron 5, Figues 4, Alob 4, Senining 3, Montecillo 2
USPF (78) - Corcilles 25, Gigante 13, Diapera 10, Baguio 10, Arong 8, Catipay 6, Rosales 3, Miñoza 1, Silao 1, Tumulak 1. - BANAT NEWS