Seguridad sa Baguio gipahugtan

CEBU, Philippines - Gipahugtan karon sa kagamhanan sa Baguio City ang ilang seguridad sa tuyo nga dili mabalda si Manny Pacquiao sa iyang training sa nahisgutang siyudad alang sa umaabot niining sangka batok ni Miguel Cotto karong Nobiyembre 14 didto sa MGM Grand Garden Arena sa Las Vegas, Nevada.

Si Pacquiao mopahigayon og usa ka bulan didto sa Baguio sa dili pa molarga paingon sa Estados Unidos alang sa iyang final training. Nangahas si Pacquiao paglangkat sa WBO welterweight belt gikan ni Cotto ug ang labing unang WBC Diamond Belt.

Si Baguio City Mayor Reinaldo Bautista Jr. nagkanayon nga bisan pa man og nailhan na ang ilang siyudad nga usa ka malinawon nga dapit, gipahimangnoan gihapon niya ang iyang mga konstituwente nga dili moduol ug magsamok-samok ni Pacquiao.

Giandam na usab nila ang seguridad sa kampo ni Pacquiao, kinsa mopahigayon og inadlaw-adlaw nga jogging didto sa bukirang bahin sa Baguio.

Si Pacquiao ug kaubanan hatagan usab og private security group nga maoy mobantay kanila.

Gipadayag usab ni Bautista nga dakung garbo ang pag-train ni Pacquiao sa ilang lugar ug gihulagway usab niya nga haom ang Baguio nga training site alang sa pambansang kamao kay angkabugnaw sa klima susama ka bugnaw didto sa Estados Unidos. - Lemuel P. Maglinte (BANAT NEWS)