Mayweather daog sa desisyon - Guardo

CEBU, Philippines - Napanglantawan ni sportsman-businessman Jonathan 'Atan' Guardo nga ang gipaabot nga showdown tali ni Floyd Mayweather Jr. sa United States ug Juan Manuel Marquez sa Mexico molungtad ngadto sa 12 ka hugna diin si Mayweather maoy moguwang mananaog pinaagi sa desisyon.

Si Mayweather, kinsa mobalik og katkat sa ring human sa 18 ka bulan nga pagretiro, mosuway pag-ilog og balik sa iyang estado isip pound-for-pound king dihang iyang sangkaon si Marquez karong Domingo (oras dinhi sa Pilipinas) didto sa MGM Grand Garden Arena sa Las Vegas, Nevada.

Si Guardo aktibong nalambigit sa grassroots sports development dinhi sa Sugbu ilabi na sa boksing. Aduna sab siya'y six-fight contract uban ni world super flyweight champion Nonito Donaire Jr. isip official endorser sa nabantog nga food supplement Arthro Kontra Arthritis.

Si Mayweather mismo nga naglaum og hinugtanay nga kumbati batok ni Marquez, apan anaa kaniya ang kahigayonan nga modaog.

Sa iyang bahin, si Marquez misaad nga mohimo og dakung surpresa sa maong higanteng away sa iyang karera. - Yoyo R. Abayan (BANAT NEWS)