Makalibog na sports

CEBU, Philippines - Hangtod karong panahona, wala pa nako matugkad o mabasa ang mga origin sa mga matang sa sports ilabi na kung maghisgot kita sa rules ug scoring system.

Gamay pa lang akong bata ug mao pay pagsikat nilang Manny Paner nga produkto sa UV, ganahan na ako og duwang basketball busa dili nako ikalimod nga ang basketball maoy akong paboritong sports.

Apan karon lang sab nako matugkad nga ang pinakamaanindot ug pinakamaayong sports nga na-imbento sa tibuok kalibotan mao diay ang TENNIS. Kini sab ang pinakamaluloy-on ug pinakaparaygon nga matang sa sports. Tiaw mo na bisan og “zero” ang imong kontra, tawgon gihapon og LOVE. Kung mahuman ang duwa nga wala kay score, LOVE SET. Sus, gugmang pinahimutang? Kaanindot no?

Lain nakong di masabtan nga sports mao kining softball o baseball.

 Unsa man pagka-softball nga pwerte man gahia sa bola. Sa tinuoray lang, kaniadtong high school pa ako, mibukol akong agtang na-igo sa bola sa softball ug samot akong naglagot dihang nangutana nako ang akong higala nganong nibukol ko nga softball ra man unta ang naka-igo?

Naglibog sab ako niining football nganong apilon man og gamit ang abaga ug ulo? Kung sa basketball imong patiran ang bola samtang nag-depensa usa ka violation kay kuno kickball. Unya sa football nganong dili man violation ang headball ug shoulderball? Libog no?

Otro sab ning American Football nga sila ra gyu’y nakasabot nganong ila nang gitawag og football nga halos tibuok duwa, kamot ang gigamit sa pagdagan-dagan ug mogamit lang sa tiil atol sa penalty kick. Sorry kaayo pero ambot nakasabot ba kaha’g Iningles ning mga Amerikano.

Makahinumdom lang hinuon ko sa binuang nga estorya sa akong amigo kalabot sa usa ka player nga mi-tryout og basketball kinsa mipauli ug wala na motiwas og duwa kay naglibog kuno siya sa referee. Kung iyang ilakaw ang bola tawagan siya’g walking, kung iya sab idagan tawagon sab og running. Unsa man kuno’y iyang buhaton busa mipauli na lang siya. Hehehe, mga coaches, binuang ra to ha.

* * *

Saulogon sa mga sakop sa media—tri-media in general (print, tv, radio) ang tinuig nga Press Freedom Week pinaagi sa parada karong Domingo, Septiyembre 20 nga adto manukad sa Ayala Business Park. Mao kini ang pipila lang sa mga adlaw nga magkahiusa ang mga sakop sa media dinhi sa Sugbo nga kanunay kuwang og oras alang sa tagsa-tagsa ka trabaho.

Gawas sa Press Freedom Week, magkatigum ang media kung panahon sa ting-pasko ilabi na ang ipahigayon nga Media party nga kanunay paluyohan sa San Miguel Corporation matag tuig. Salamat gyud ninyo Girlie Garces ug Jerry Roa ang mga higala sa SMC nga wala’y paglubad mas molubad pa gud kuno ang Chinese gold.

Atong panghinaut nga kining Press Freedom Week mag-anam og kaanindot matag tuig ug dili kini mahimong Press Freedom Weak sa kadugayan.

SG Miscellaneous. A warm and sincere birthday greetings to our Editor in-Chief Jerry Tundag tomorrow and advance happy greetings to our General Manager Sir Boy Mendoza on Sept. 20 and to our Managing Editor Nimrod Quiñones on Sept. 21. Belated birthday greetings too to Nellie Po, Connie Ramos and Rosita Ladonga. My apology to my cousins I missed the vigil and burial of auntie Vilma Veloso last week due to lack of communication. - BANAT NEWS