Jaguars kaging sa Panthers

CEBU, Philippines - Gipakuratan sa University of Southern Philippines-Foundation (USPF) Panthers ang mas lig-on nga University of San Jose Recoletos (USJR) Jaguars kaniadtong Sabado pinaagi sa pag-iskor og 80-75 nga upset nga kadaogan atol sa ilang kataposang duwa sa elimination round sa nagpadayong Cebu Schools Athletic Foundation, Inc. (CESAFI) didto sa Cebu Coliseum.

Makapa-isa sab sa kilay tungod kay ang Panthers mao kanunay ang naglabaw hapit sa kinatibuk-ang duwa ug bisan pa misipyat sila og lima sa ilang unom ka free throws sa kataposang 3:18 sa fourth quarter, wala madayon ang ilang pagkahugno sa fourth quarter ug naka-eskapo og singko puntos nga kadaugan. Daan sab silang naglabaw sa halftime, 34-32 ug ilang gitapos ang third period sa 58-56 nga abante human sa buzzer-beating triple ni Ellison Rivera.

Dugay wala makatingog si coach Raul Latonio Sr. sa Panthers dihang gikuha-an siya'g komentaryo kalabot sa maanindot nilang duwa ug kung unsay ilang preparasyon alang sa Jaguars. "Murag wala pa man ko'y ika-komentaryo ron panahona. Nalipay lang ko nga wala na gyud mi modayon og collapse sa fourth quarter kay kana ra gyu'y problema nga among sulbaronon," mitug-an si Latonio sa Banat Sports.               

Bug-at og punto ang gipamulong ni Latonio tungod kay sa miaging tulo ka duwa, nahiagum sila'g masakit nga kapildehan diin sila kanunay ang maglabaw sa duwa ug adto sila bikogan sa fourth period hinungdan sa ilang kapildehan nga pulos wala kaabot og 10 puntos.               

Ang Panthers mikaging batok sa CIT, 68-70 tungod sa kadanghag sa depensa, miyukbo sab sa mga kamot sa SWU, 72-80 diin sila kanunay ang naglabaw hangotd sa kataposang singko minutos sa fourth period ug napilde sab sa USC, 63-70 inay sila unta maoy dumadaog niadtong tungora apan nalukapa sila sa hugot nga depensa nga gipatuman sa Warriors. Ang ilang dagkong pilde naggikan lang sa UC ug UV.                          

Kanunay gyud naglabaw ang Panthers sa kinatibuk-ang second half apan mihana na sab ang ilang kahuyang sa fourth period tungod kay ila mang gihatagan og higayon nga makatabla ang Jaguars sa parehong 75 may 31.6 segundos pa ang nahibiling oras human sa split charities ni Kurt Amores tungod sab kay misipyat sila og sagunson nga lima ka free throws---upat niini kang Elwin Durano ug ang usa kang Fritz Dajalos hinungdan nga igo lang silang milabaw og usa ka palito, 72-71 sa wala pa kini matabla ni Amores sa iskor 75.

Apan gibawi ni Durano ang iyang mga sipyat aron sakmiton pag-usab ang labaw alang sa Panthers og si Mil Anthony Linao mi-iskor sab og usa sa duha ka free throws aron inaton ang ilang labaw ngadto sa 75-71 may usa na lang ka minuto ang nahibilin sa duwa.

Kalit lang usab dayong misikit ang Jaguars human mosukli si Marvin Duran og three-pointer ug nakakubit og foul gikan ni Linao aron pagsikit, 74-75 ug si Amores maoy mitabla sa iskor sa 75 pinaagi sab sa iyang split charities.

Human sa 77-75 nga basket ni Durano, gitawagan og technical ang coach sa Jaguars nga si Edito Salacut tungod sa sigeng reklamo nganong wala tawagi og foul si Durano samtang misuway og drive sa kataposang 11.8 segundos nga maoy naghatag og balik og labaw alang sa Panthers.

Hugtanong gibarugan sa mga referees ang ilang desisyon apan wala didtong tungora matapos ang sugilanon tungod kay human gyud sa duwa, miduol dayon si Salacut ug ang iyang coaching staff aron pagtataw sa maong hukom pagtawag og technical foul kaniya nga diriyot gyud makamugna og kagubot apan napakgang sa mga nag-unipormeng kapolisan sulod sa coliseum.

Nakapasulod si Rivera sa duha ka technical free throws aron pag-inat sa labaw, 79-75 ug dayon si Dajalos miselyado sa kadaogan pinaagi sab sa iyang usa ka free throw may 5.9 segundos ang nahiblin aron tangagon ang lima ka puntos nga kadaogan ug paghatag og 2-5 nga baraha alang sa Panthers.

Si Durano kinsa maoy hari sa slam dunk sa miaging tuig, maoy nangu sa Panthers pinaagi sa iyang 19 puntos ug si Dajalos midugang og 18 puntos ug si Rivera may 12 puntos.

Ang Jaguars nga tataw gyud nga medyo gidimalas, gipangulohan nilang Jerome Villaver ug Duran sa ilang 15 ug 11 puntos matag usa apan wala makahuygo si Edwin Bibera kinsa na-fouled out nga dala ang iyang sayis puntos, ang starting guard nga si Edmar Pateño igo lang sab nakahimo'g kuarto puntos ug si Amores kinsa maoy ilang big man, wala makahimo'g double figures.

Ang Jaguars naghupot na karon og 3-2 nga baraha.

Puntos matag usa:

USPF (Srs.) 80—      Durano 19, Dajalos 18, Rivera 12, Tinoy 8, Linao 7, Filoteo 7, Fuentes 3, Tabada 2, Bardilas 2, Sedurifa 2

USJR (Srs.) 75-—     Villaver 15, Duran 11, Amores 9, Lapiz 9, Nidalo 7, Bibera 6, Suliman 6, Pateño 4, Dela Peña 4, Dela Rama 2

Halftime: 34-32. – BANAT NEWS