Warriors giluwas ni Padillo

CEBU, Philippines - Naanghelan pa ang University of San Carlos (USC) Warriors human matuhog ni Giovanni Padillo ang iyang 3-point shot sa nahabiling 1.7 segundo aron pagposte og 74-73 nga kadaugan batok sa Southwestern University (SWU) Cobras sa nagpadayong aksiyon sa 9th Cebu Schools Athletic Foundation Inc. (CESAFI) basketball event niadtong miaging gabii diha sa Cebu Coliseum.

Mga Duwa Sa Sabado (Cebu Coliseum)

1:00 pm USJ-R vs. CEC (Jrs.)

2:30 pm USC vs. SHS-J (Jrs.)

4:00 pm SWU vs. CIT (Srs.)

5:30 pm USJ-R vs. USPF (Srs.)

Ang Warriors nabiyaan og dos puntos, 71-73 sa katapusang 8.1 segundo,   apan si Padillo nakadawat sa inbound pass pipila lang ka lakang gikan  sa ilang bench, midribol og makadiyot ug kalit mitugpo sa iyang mahinungdanong 3-point shot.

Misuway unta og rekober ang Cobras sa nahabiling 1.7 segundo, apan nasipyat ang ilang marka bahala nga itsa dayong kahurot sa oras.

Katapusang nakatilaw og labaw ang Cobras sa iskor nga 73-71 human sa lay-up sa beteranong guwardiya nga si Arrd Diango, kay si Padillo mipakita man og milagro sa himalatyong oras sa duwa.

Si Sam Jordan Hermosa mipupo og 16 puntos, samtang si Padillo miani og 14 puntos alang sa Warriors, kinsa nagbitbit karong og 3-3 nga baraha.

Lain pang Warriors nga mikulit og double figures mao   si Cantonao nga adunay 11 puntos ug sila si Joven Cid Cortes ug Gallarde nga miabuno og 10 puntos matag usa.

Ang Cobras, kinsa midailos sa ikalimang dapit nga nagtangag og 2-3 nga baraha gipangulohan ni Eliud Poligrates pinaagi sa iyang 15 puntos, gisundan ni Rene Pacquiao nga mikamada og 13 puntos.

Puntos Matag Usa

USC (74) - Hermosa 16, Padillo 14, Cantonao 11, Cortes 10, Gallarde 10, Padayao 7, Bautista 2, Bercede 2, Bakker 2

SWU (73) - Poligrates 15, Pacquiao 13, Gallarde 11, Pria 11, Jalandoni 8, Diango 8, Ortuyo 5, Litorja 2. – BANAT NEWS