Teletech mibawos sa e-Telecare sa BPO caging

CEBU, Philippines -  Migimaw ang gamay'ng tilimad-on alang sa posibleng   "rematch" sa finals sa miaging tuig human ang   defending champion Teletech Titans ug runner-up Convergys mipaluhod sa ilang tagsa-tagsa ka kaatbang sa "best-of-three" semifinals sa 5th Inter-BPO Championship diha sa Cebu Sports Club-Cebu gym sa Cebu Business Park.

Nabuhi og balik ang damgo sa Teletech Titans nga   mapanalipdan ang ilang titulo human makabawos ngadto sa e-Telecare sa Game-2 sa iskor nga 51-47, samtang ang Convergys miangkon sa Game-1 pinaagi sa paglubong sa Aegis People Support sa iskor nga 71-58.

Human masugamak sa series opener sa iskor nga 61-68, ang Teletech Titans nakabangon pinaagi sa pagpatuasik sa ilang mga puntos.

Igo lang milabaw og dos puntos ang Teletech Titans sa first period, 13-11, apan kalit lang kining milusad og15-4 nga rally sa sunod nga kuwarter aron inaton ang labaw sa halftime, 28-15.

Si Shem Banua maoy topscorer alang sa Teletech Titans nga miburak og 12 puntos. Sila si Benjie Mancao ug Vicente Adolfo nagkumboya og 23 puntos alang sa pilderong e-Telecare.

Sa laing bahin, sila si Venerando dela Peña Jr. ug Marc Pajo parehong mibahog og 14 puntos aron pangulohan ang Convergys, samtang ang Aegis People Support gipangulohan sab ni Mariel Vincent Barrera pinaagi sa iyang 11 puntos, gisundan ni Philip George Carabuena nga adunay 10 puntos.

Puntos Matag Usa

Unang duwa:

Teletech (51) - Banua 12, Biaño 9, Limpangog 9, Sultan 7, Abellanosa 4, Clemente 4, Cabahug 2, Indulos 2, Abordonado 2

e-Telecare (47) - Mancao 12, Adolfo 11, Mercader 8, Cabrera 5, Basto 5, Mangubat 4, Burgos 3

Ikaduhang duwa:

Convergys (71) - Dela Peña 14, Pajo 14, Esteban 11, Tapic 8, Goricho 5, Mabanto 5, Corbet 4, Ngo 3, Sugatan 3, Codilla 2, Villarin 2  

Aegis People Support (58) - Barrera 11, Carabuena 10, Rabuya 9, Cabrera 6, Nayon 6, Zanoria 5, Ylaya 3, Roma 3, Gamallo 3, Minoza 2. – BANAT NEWS