Ginukdanay karon

CEBU, Philippines - Lisud nga tahas ang sagubangon ni kanhi "Cebu King of the Road"   Mendel Lopez kay mga bantugang runners gikan sa Visayas ug Mindanao ang modagan uban kaniya sa 10K division sa Don Sergio Osmeña Sr. (DSOS) nga mosikad karong   buntag diha sa Cebu City Hall.

Si Lopez, kinsa milaylo sa makadiyot sa pag-apil og mga marathon human makuha sa RP Team aron morepresentar sa nasud sa SEA Games, mao ang naghari sa 10K Run sa miaging Canduman Fiesta Run niadtong Domingo.

Si race director Joel Baring nagkanayon nga lakip sa mosalmot sa lumba karon mao ang taga-Negros nga si Angelito Sibayan ug ang beteranong runner gikan sa Davao City nga si Critfrancradel Indapan.

Ang managsuong Delposo nga sila si Eugene ug Joel, gipaabot sab nga mopakita'g aksiyon karong adlawa.

Sama ni Lopez, si Leizl Lumindas-Getaruelas, kinsa mobalik sa aksiyon human mipahulay sa pag-apil og lumba magsagubang usab karon og dakung hagit batok sa laing top runners sa 10K women’s division.

Mohatag og labad ni Getaruelas mao ang suod niyang higala nga si Madelyn Carter ug ang taga-Zamboanga nga si Mary Grace delos Santos, kinsa naglaraw nga mosakmit og laing kampiyonato.

Sa laing bahin, ang running couple nga sila si Dr. Yong Larrazabal ug Donna Cruz-Larrazabal modagan karong adlawa  agi’g pagpangandam sa ilang pagsalmot sa Robinhood Marathon sa United Kingdom karong Septiyembre 13.

Gawas sa 10K men’s ug women’s open, may lumba sab sa Masters Division nga gibahin ngadto sa upat nga kategoriya -- A, B, C ug D.

 Ang maong lumba nga gipahinungod sa giilang “Grand Old Man of Cebu” nga si Don Sergio Osmeña Sr. sa kasumaran sa iyang adlaw'ng natawhan, gipasiugdahan sa Cebu City Sports Commission uban sa suporta sa kagamhanan sa siyudad sa Sugbu. – BANAT NEWS