University of the Visayas vs Southwestern University

CEBU, Philippines - Wala makasinati og problema ang University of the Visayas (UV) Green Lancers bisan pa og wala moduwa ang higanteng si Gregory Slaughter.

Ang Lancers pungtanon nga mipabuhagay og 17-0 run sa nanghinapos sa duwa aron ihawon ang Southwestern University (SWU) Cobras, 79-69 ug aron magsolo sa ikaduhang dapit sa 9th Cebu Schools Athletic Foundation Inc. (CESAFI) basketball event niadtong Domingo diha sa Cebu Coliseum.

 Bisan tuod og wala ang 6-foot-11 nga si Slaughter, kinsa miserbisyo sa iyang usa ka duwa nga suspensiyon bayad sa iyang pagka-eject tungod sa nahimong "unsportsmanlike" foul batok sa University of Southern Philippines Foundation (USPF), ang Lancers nakahimo gihapon sa pagdominar sa duwa. Apan nahulga ang Lancers dihang ang Cobras misikit sa iskor, 60-59 kortesiya sa free throws ni Eliud Poligrates sa nahabiling 7:43 sa duwa.

Ang jump shot ni Phil Mercader maoy nagduslit sa usa ka mainitong rally sa Lancers, kinsa milunod og 18 puntos nga labaw, 77-59 katapusang 2:30 sa duwa.

 Gawas ni Mercader, ang uban pang mga key players nga mihimo og makalilisang nga atake mao sila si Ralf Olivares, Harold Cincoflores, Chris Victor Diputado ug Ritchum Dennison.

Naugkat ni Chris Litorja ang naungot nga iskor sa Cobras, apan ulahi na ang tanan kay ang Lancers nag-ambo na sa   ganghaan sa kadaugan.

Sila si Mercader ug Dennison parehong milunod og 16 puntos, samtang si Diputado miligwat og 12 puntos alang sa Lancers ni coach Elmer 'Boy' Cabahug, kinsa misakmit sa ilang ikalimang daog batok sa usa ka pilde.

Si Gilbert Gallarde, kinsa maoy nikontrolar sa ilawom tungod sa pagka-wala ni Slaughter mirehistro og 18 puntos, apan dili kini igo aron iyang mapadaog angCobras nga nagbitbit og 2-2 nga baraha.

Si Eliud Poligrates miamot og 13 puntos, samtang sila si Litorja ug Arrd Diango nagkumboya og 21 puntos sa maong kapildihan.

Ang Cobras nagtinguhang mobangon gikan sa ilang kapildihan sa dihang ilang harungon ang University of San Carlos (USC) Warriors karong alas-6 sa gabii, human sa engkuwentro tali sa USPF Baby Panthers ug CIT Wildkittens nga sugdan sa alas-4:30 sa hapon. 

PUNTOS MATAG USA

UV (79) - Mercader 16, Dennison 16, Diputado 12, Cincoflores 7, Rez 7, Lasala 6, Calo 6, Olivares 5, Cabahug 2, Lao 2

SWU (69) - Gallarde 18, Poligrates 13, Litorja 11, Diango 10, Armecin 8, Pria 4, Palileo 3, Jalandoni 3 (Gabby G.Malagar)   (BANAT NEWS)