Cañeda, Meyer napiling 2009 Miss Milo Little Olympics

CEBU, Philippines - Tinun-an sa Cebu Normal University (CNU) ug University of San Carlos (USC) maoy gikoronahan isip "best muse" sa ilang tagsa-tagsa ka dibisyon atol sa pagpili sa 2009 Miss Milo Little Olympics-Visayas kagahapon diha sa Cebu City Sports Center (CCSC).

Si Pearl Marie Cañeda sa CNU mipakita sa iyang makadani nga postura aron angkonon ang titulo sa elementary division.

Ang 12-anyos nga si Cañeda usa ka dancesport champion human mikabkab og bulawang medalya sa latin ug standard youth categories sa Dancesport Council of the Philippines (DSCPI) First Quarterly National Rankings and Competitions niadtong Marso didto sa Philsports Arena sa Pasig City.

Si Stefi Catherine Sasuman sa University of San Jose-Recoletos (USJ-R) maoy nahimong first runner-up, samtang si Vida Joyce Gemal sa Cebu City Central School maoy second runner-up.

Sa secondary division, si Stephanie Meyer sa University of San Carlos (USC) mipupo og maayong bunga sa labing una niyang pagsalmot sa beauty contest human siya gideklarar nga overall winner.

Si Cleofe Jerroe Blanco sa Cebu Eastern College (CEC) misakmit sa first runner-up trophy, samtang si Mae Regil Versoza sa St. Scholastica’s Academy maoy second runner-up.

Sila si Jasmine Vilar sa Guadalupe Elementary School ug Mary Juelene Repunte sa Immaculate Heart of Mary Academy maoy nidaog sa Miss Milo Personality awards.

Wala sab magpabitin ang City Central School ug Abellana National School human ilang giharos og daog ang best in parade ug saludo, most disciplined delegates, loudest cheer ug ingon man ang biggest delegation. - Yoyo R. Abayan (BANAT NEWS)