USC, UC nidominar sa CESAFI swimming event

CEBU, Philippines - Ang University of San Carlos (USC) tankers maoy milangkat sa overall championship, samtang si Paula Abigail Vega sa University of Cebu (UC) miwitik sab og maayong performance sa 2009 CESAFI swimming competition niadtong Domingo diha sa Cebu City Sports Center (CCSC).

Gipakyaw ni Vega ang tanan niyang lima ka events lakip na ang rekord-breaking performances nga nakapahimo kaniya isip most outstanding swimmer sa tertiary division.

Human sa iyang unang aksiyon sa tertiary level uban ang rekord sa 200m freestyle, ang 17-anyos nga si Vega misiak sa 400m freestyle mark uban sa iyang 5:08.49 nga oras ug sa 400m freestyle uban sa oras nga 10:46.31, nga mipapas sa kaluhang mga rekord nga nahimo ni Larissa Ang sa tuig 2004.

Ang karaang meet records sa 100M freestyle sa oras nga 1:11.25 nga nahimo ni Lejani Pacheco niadtong 1998 nabuak sab ni Vega pinaagi sa iyang 1:08.40 nga oras.

Gitapos ni Vega ang iyang kampanya pinaagi sa pagrehistro og 1:18.71 sa 100m backstroke. Iyang nabuak ang 1:20.26 nga nahimo ni Clanel Celerio niadtong 2006.

Sa secondary level, si Loren Dale Echavez sa USC mao sab ang nidominar uban ang lima ka bulawan, apan pakyas pagkopya sa kadaugan ni Vega human napalpak sa pagbuak sa usa sa mga rekord sa iyang events.

Si Echavez nakabaton na og rekord sa 200m freestyle uban ang personal best time nga 2:15.93, sa 400m freestyle nga mioras og 4:53.95, sa 100m freestyle sa oras nga 1:02.11 ug sa 50m freestyle uban ang 28.84 segundos.

Ang UC secondary girls team nagkupot sab karon og rekord sa 200m ug sa 400m medley relay ug ingon man sa 200m freestyle relay, samtang ang USC nanghawod sa tertiary women's 200m freestyle relay.

Sa kinatibuk-an, ang USC milangkat og titulo uban ang 18 ka golds, walo ka silvers ug lima ka bronzes sa secondary division ug 30-16-15 sa tertiary level.

Ang UC mitapos sa kompetisyon uban ang 10-18-15 medal tally sa secondary ug 10-golds, 15-silvers ug siyam ka bronzes sa collegiate division. (BANAT NEWS)