Taguig, Pampanga magsangka sa finals

CEBU, Philippines - Ang host Forward Taguig ug Smart-Pampanga Buddies maoy magsangka sa kampiyonato sa Taguig City leg sa Smart Liga Pilipinas Conference 3 bisan og aduna pa sila'y nahabiling usa ka duwa sa eliminasyon human milansang og daog niadtong Huwebes sa gabii didto sa C.P. Tinga Memorial Hall sa Taguig City.

Yano kaayong mikulit og daog ang Taguig human gilubong ang Zamboanga Uno Latinos, 83-70, samtang ang Buddies nangayo pa'g overtime aron maka-ikyas sa Cebu Landmaster-Mandaue sa iskor nga 79-76.

Ang duha ka koponan milansang sa ilang ikaduhang daog ning maong torneyo nga gipaluyohan sa Smart, Accel, Molten, Calcium-Cee, Gatorade, Air21 ug Burlington.

Mag-abot sila sa leg championship karong adlawa, samtang ang Zamboanga ug Mandaue magsangka alang sa ikatulong dapit.

Human sa hugot nga kumbati sa first half diin igo lang sila milabaw og tres puntos, 49-37, ang Taguig milusad og 28-5 nga rally nga gisugdan ni Ardy Larong ug gisundan nilang Lou Gatumbato, Harold Sta. Cruz ug Nat Cruz aron pagposte sa ilang kinadak-ang labaw, 68-42 sa third period.

Si Paul Reguera maoy nangulo sa Taguig sa iyang 17 puntos lakip na lima ka triples nga iyang nakuha sa first half.

Ang pilderong Zamboanga gipangulohan ni Christopher Concepcion, kinsa mikimada og 20 puntos.

Unang duwa:

Pampanga (79) – Sta. Maria 14, An. Espiritu 11, Magpayo 10, Gelig 10, Tan 10, Saguindel 8, Arao 5, Taylor 5, Al. Espiritu 5, Villamin 1

Mandaue (76) – Cenita 17, Tangkay 13, Cavan 10, Aying 8, Llanto 6, Solis 6, Bucao 5, Mercado 5, Alcaraz 4, Latonio 2

Ikaduhang duwa:

Taguig (83) – Reguera 17, Gatumbato 14, Marquez 10, Sta. Cruz 9, Larong 7, Moody 6, Cruz 6, Leynes 6, Ortiguerra 4, Alfad 2, Vijandre 2

Zamboanga (70) – Concepcion 20, Parreno 11, Bolias 9, de Castro 6, Dais 5, Tajonera 4, Climaco 4, Alvarez 3, M. Lozano 3, Merced 3, Cordero 2 . - Yoyo R. Abayan (BANAT NEWS)