Super Idols miharos sa 3rd IBP caging

CEBU, Philippines - Giharos sa Super Idols ni coach Atty. Bong Pepito ang elimination round human nila gilubong og 15 puntos ang Pañero, 72-57 sa 3rd season sa Integrated Bar of the Philippines (IBP) 2009 basketball tournament diha sa Capitol Parish Gym sa dalan Escario, ning dakbayan.

Ang Super Idols nangigo dayon sa ilang mga tirada sa first quarter, apan misumbalik sab ang Pañeros aron sakmiton ang labaw sa halftime, 34-33.

Apan gipakusgan sa Super Idols ang ilang duwa sa third period nailog nila og balik ang labaw, 50-42 ug sukad niadto wala nila hatagi og higayon ang Pañeros nga makasikit pa.

 Si Benjo Santiago milansang og 22 puntos ug si Fermin Pepito mitampo og 15 puntos alang sa Super Idols. Sila si Flor Yosores ug Ramsey Quijano miamot og 10 puntos matag usa alang sa Super Idols, kinsa nagbitbit og limpiyong 7-0 nga baraha.

 Ang Pañeros nga midailos ngadto sa 5-2 nga baraha,

gipangulohan ni Barry Busi, kinsa mihakot og 14 puntos, samtang si Dennis Aliño mi-iskor og 12 puntos.

Sa sayo pa, ang Pecandela Law Firm mipukan sa Zion sa iskor nga 56-54 alang sa ilang ikalimang daog sulod sa pito ka duwa.

Ang Opascor Eagles nakatilaw na gyud og daog human ilang gipilde ang YLAC, 80-76.

 Si Al Lagahit mihipos og 17 puntos ug si Jun Hiyas adunay 16 puntos alang sa Opasco, samtang si Resty Arnaiz miburak og 32 puntos ug si Val Ligutan midugang

og 18 puntos alang sa

YLAC. - Gabby G. Malagar (BANAT NEWS)