Cebu Niños, 2-0 na

CEBU, Philippines - Ang tang-ang M. Lhuillier Kwarta Padala-Cebu Niños mikulit sa ilang ikaduhang daog human gilubong ang GenSan-Pacman MP Warriors, 92-75 sa Cebu leg sa Smart-Liga Pilipinas Conference 3 kagahapon diha sa Cebu Coliseum.

Bitbit ang 2-0 nga baraha, ang Niños ni team owner Michel J. Lhuillier ug coach Raul 'Yayoy' Alcoseba, hayag na nga moduwa sa finals bisan og aduna pa kini duwa batok sa Quezon Red Oilers karong alas-7 sa gabii.

Maayo unta kaayo ang dagan sa duwa sa MP Warriors sa sayong bahin sa engkuwentro diin nakatabla kini sa makatulo ka higayon, ang katapusan, 9-all kay sila si Bruce Dacia, Woodrow Enriquez ug Stephen Padilla mitusak og upat ka sunod-sunod ka triples aron hatagan ang Niños og 21-11 nga bentaha. Miabot pa kini ngadto sa 20 puntos, 45-25 nga maoy labing dakung labaw nga nahimo sa Niños sa nahabiling 2:53 sa second period, apan ang isog nga Warriors mi-rally aron pagkitkit sa labaw ngadto sa siyete puntos, 71-78 sa nahabiling 3:04 sa duwa.

Apan didto ra kutob ang ilang lahutay kay namungot man og balik ang Niños.

Si Dacia mikulit og 19 puntos, samtang sila si Enriquez ug Ariel Mepaña miamot og 18 puntos matag usa. Ang pilderong Warriors ni Manny Pacquiao gipangulohan ni Christian Cabatu, kinsa mitimbre og 18 puntos.

Sa laing bahin,  ang Laguna Trace Stallions mipukan sa iskor nga 83-70.

Unang nikiat ang Red Oilers sa pagsugod sa duwa sa giya nilang Jonathan Piñera ug Mark Magsumbol aron hatagan og tres puntos nga bentaha ang ilang koponan sa first period sa iskor nga 18-15.

Apan ang Stallions mipakita sa ilang kabangis ug mibawos sa sunod nga kuwarter ug nailog ang labaw, 30-27 human sa three-point shot ni Jay-R Estrada sa nahabiling 3:57 sa second period.

Sama sa miagi nilang duwa, ang free throws ug rebounding pabiling suliran sa Oilers. Nakahimo sab sila og walo ka turnovers sa second half nga maoy nakahatag og pabor sa Stallions.

Puntos Matag Usa

Unang duwa:

Laguna (83) - Bolocon 21, Gaco 12, Ricafuente 10, Sanz, 9, Duruelo 6, Villaver 5, Misa 5, Estrada 5, Legaspi 2, Musni 2, Mangahas 2, Angeles 1

Red Oilers (70) – Palaganas 17, Labagala 11, Piñera 9, Macanig 7, Suguitan 5, Magsumbol 5, Panzo 4, Gavina 3, De Leon 3, Cacha 2, Chua 2, Orias 1   

Ikaduhang duwa:

Cebu (92) – Dacia 19, Enriquez 18, Mepaña 18, Padilla 12, Basco 8,Saladaga 7, Ababon 4, Nailon 4, Santos 2

GenSan (75) – Cabatu 17, Mendoza 15, Medalla 11, Sagad 7, Coronado 6, Rubi 6, Conchca 4, Farochilen 3, Callo 2, Gonzaga 2, Recustodio 2. – BANAT NEWS