PABC nidominar sa Fight Night Boxing Series

CEBU, Philippines - Tulo sa lima ka boksidor sa Philippine-Australian Boxing Club (PABC) ang nilampos pagpukan sa tagsa-tagsa nila ka kaatbang aron dominahon ang Summit Natural Drinking Water Fight Night Amateur Boxing Series alang sa bulan sa Agosto niadtong weekend diha sa Mandaue City Plaza Square sa dakbayan sa Mandaue.

Ang 28 kilogram prospect nga si Reymundo Rama ug ang pambato sa 29 kgs. nga si Rayson Tarona maoy nangulo sa kalampusan sa PABC uban ni Jason Tuñacao.

Si Rama mipahunong ni John Ver Otik sa Apas Elementary School sulod sa 51 segundos sa third round, samtang si Tarona mipatigbabaw batok ni Bryan Remedio sa Cabancalan human gihunong sa referee ang away sa round 2.

Napugos ang referee pag-undang sa away tungod sa walay hunong nga pagdugo sa ilong ni Remedio human maigo sa kumo ni Rama.

Sa iyang bahin, si Tuñacao milupig ni Uelmark Dignos, 2-1, sa ilang sangka sa 39 kgs. division. 

Hinuon, ang igsuon ni Uelmark nga si Melmark midaog batok ni Jeffrey Estel sa PABC, 3-0 sa 30 kgs. class.

Laing PABC boxer nga si Bebe Rama ang napukan usab batok ni Archie Jakosalem sa Sanai Boxing Club sa 23 kgs. division.

Gawas ni Jakosalem, si Angelo Angalot mihatag usab og daog sa Sanai, kinsa mi-iskor og 3-0 batok ni Reycon Lumeles sa 38 kgs. class, apan ang ilang kauban nga si Ariel Sibay napakyas pagsakmit og daog dihang gipahunong siya ni Ramel Casanares sa 25 kgs. class.

Sila si Michael Romarate ug Joseph Ebalang maoy milusot sa Cabancalan. Si Romarate midaog batok ni Joedel Talle sa 49 kgs. division, samtang si Ebalang mipukan ni Jumar Alburo sa 52 kgs.

Sa iyang bahin, si Gerald Suigo nangayo lang og 50 segundos aron pildihon si Jessie Dignos sa ilang away ubos sa 47 kgs. division. Si Mark Bernaldez sa Butuan mipukan sab ni Joseph Peligrino sa Bogo.   (BANAT NEWS)