CDU Run himuong international competition

CEBU, Philippines - Daku'g tinguha si Dr. Yong Larrazabal nga ang iyang nasugdan nga Cebu Doctors' University (CDU) Run himuon nga internasyonal nga kompetisyon sa umaabot.

"Hopefully, this will not only be limited to Cebu. We plan to invite runners from all over the country and in the future, who knows, we can make it an international event," matud pa ni Larrazabal atol sa paglusad sa 4th University Run kagahapon.

Nasugdan ang University Run tulo na ka tuig ang nilabay ug nagdaku ug nagkadaghan sa matag tuig diin liboan ka runners ang nahimong kabahin niini.

Sa edisyon ning tuiga nga gikatakda karong Agosto 23 diha sa CDU-Mandaue campus, dili momenus 5,000 ka runners ang gipaabot nga mopakita'g aksiyon kini naglakip nilang Senator Pia Cayetano, ang asawa ni Dr. Larrazabal nga si Donna Cruz ug iyang ig-agaw nga si Sunshine Cruz ug ang bana nga si Cesar Montano.

Ang lumba nga gipaluyohan sa Sun Cellular naglatid og tulo ka race lengths -- 10K for men and women's open ug ang doctors class, 5K alang sa mga tinun-an ug mga kawani sa CDU 3K alang sa fun runners ug ingon mga estudyante.

Ganting salapi ug mga medalya ang ihatag ngadto sa top performers. 

Ang registration fee nagkantidad og P200 libre na ang singlet ug Sun sim. Ang entry forms makuha sa CDU-Mandaue, Dr. Peter Mancao's clinic sa Cebu Doctors' Hospital ug sa Cebu City Sports Center.

Ang deadline sa registration hangtod lamang sa Agosto 19 alang sa mga tinun-an ug Agosto 22 alang sa ubang interesadong mga partisipante. (BANAT NEWS)