Ground & Pound V kumbatihan na

CEBU, Philippines - Masaksihan ang kulbahinam aksiyon tali sa Pinoy nga si Ricardo 'D Hammer' Cubillas ug sa Malaysian nga si Samchai Sip-Renchai sa Ground & Pound V: Retribution karong gabii diha sa Cebu Coliseum.

Si Cubillas sa Butuan Extreme MMA ug si Sip-Renchai sa Tenbudo MMA Malaysia maoy main event sa three-round MMA superfight ubos sa middleweight division.

Si Renan 'Limbas' Noblefranca mopakita sab sa iyang abilidad batok ni Jobert 'Da Sniper' Baylin sa Wushu Sanshou sa Cagayan de Oro City nga gitawag og gubat sa "Pride of the Visayas" batok sa "Best of Mindanao" nga maoy headline sa kickboxing card. 

 Sa MMA main event, si Ali “D’ Grappler” Malawi sa Lapu-Lapu City Mixed fighting system makiglayog usab batok ni Voltaire “Rough Neck” Gonzales sa Tagbilaran City Red Dragon MMA sa pinweight class.

 Lain pang magsangka sa MMA mao si Johnlery “Ian” Caniga sa Yaw-Yan ArDigma batok John Kevin “Spoilde” Amores sa Mandaue Bullet Muay Thai, Jeff “Labuyo” Malicay batok Gerry “Cat-Ger" Hinampas sa Red Dragon MMA, Geronimo “Daredevil” Etac batok  RG “D Master of Gentleness” Sevilleno ug James “Warrior” Solomon sa Yaw-Yan Manila batok Filton “Xenox” Inting sa Red Dragon MMA.

Makigbinukbukay usab si Jolly “The Sniper” Manalo batok ni Alan Atup. Si Eric Areglado makigbinaliay ni Randy Morres, samtang magsangka usab si Romeo Esfra batok Michael Minggeta.

Si Jecar “Aligator” Vender makigharong batok ni Marvin “D White Lion” Camba ug si Jorex Rivera makigdumog batok ni Jonathan Climaco.

Ang tiket nagkantidad og P100 sa upper box, P300 sa lower box, P500 sa ringside ug P1,000 alang sa VIP/Sponsor.

Ang maong kalihukan gipasiugdahan sa Yaw-Yan ArDigma Martial Arts Sports Promotions sa pagpangulo ni Yaw-Yan Cebu founder ug Vis-Min director Master Benigno “Ekin” R. Caniga, Jr., uban sa suporta sa Tanduay, torturefight.com, RJS Metal Ads and Prints, Cebu City Sports Commission, K-1 Extreme Sportshop, Ironics Internet Cafe, Yaw-Yan ArDigma-Sacramento, USA ug Fahrenheit Design and Solution. – BANAT NEWS