Reyes, Alcano ligtas sa silat

ILOILO City , Philippines   – Nakaligtas sina pool legend Efren ‘Bata’ Reyes at former two-time world champion Ronnie Alcano sa upset sa round of 32 matapos ang magkahiwalay na tagumpay sa The Manny Villar Cup Iloilo Leg sa SM City dito.

Tinalo ni Reyes si Joven Bustamante, 9-5, habang iginupo ni Alcano si Russian Petiza, 9-4, para manatiling nasa kontensiyon sa titulo sa prestihiyosong island-hopping series na ito na hatid ng Villards: Tulong sa Pagsulong ng Philippine Sports ni Senator Manny Villar.

Umusad si Reyes sa round of 16 alaban kay Joey Pardales na sumilat kay Rodolfo Luat, 9-7, habang susunod na makakaharap ni Alcano si Ramil Gallego na sumibak kay Jarry Pelayo, 9-7.

Binuksan ni Lee Van Corteza ang kanyang kampanyang maging unang back-to-back champion ng tournament na co-organized ng Billiards Managers and Players Association of the Philippines (BMPAP) at kinilala ng Billiards and Snooker Congress of the Philippines (BSCP) sa pamamagitan ng 9-1 pana-nalasa kay Darwin Mendoza.

Umusad din sa susunod na round sina Edgie Geronimo na tumalo kay Michael Feliciano, 9-7; Richard Pornelosa na sumi-bak kay Mike Takayama, 9-7; Carlo Biado na nanalo kay Eduardo Sy Jr., 9-6; Benjie Guevarra na tumalo kay Ricky Zerna, 9-1; Joemar De Ocampo na nanaig kay Rene Mar David, 9-1; at William Millares na dumispatsa sa kaisa-isa babaeng kalahok na si Rubilen Amit, 9-7.

Umusad din sina Warren Kiamco at Gandy Valle ngunit nasilat naman sina dating world champion Django Bustamante, Roberto Gomez at dating world No. 1 Dennis Orcollo.