Bukod kay Aguilar, sinu-sino ang mga susuwertihin sa PBA Draft ngayon?

MANILA, Philippines - Sinu-sino sa 53 rookie hopefuls ang may kalalagyan sa PBA?

Gaganapin ngayong hapon ang taunang PBA Rookie Draft sa Activity hall ng Market Market sa Taguig.

Ang siguradong may kalalagyan ay itong si Japeth Aguilar na siyang inaasahang magiging top pick overall ng Burger King.

Nakuha ng Burger King, ang nagmanang prangkisa ng Air21, ang karapatang unang pumili mula sa Red Bull kapalit ni Gabby Espinas sa isang trade.

Inaasahang mahuhugot din sina PBL MVP Chris Ross, 2007 UAAP MVP Jervy Cruz, San Beda star Ogie Menor, La Salle stalwart Rico Maierhofer, Far Eastern University guard Benedict Fernandez at University of the East star Marcy Arellano, Jose Rizal University star James Sena, Oracle guard Chris Timberlake at Kevin White, na sinasabing kamag-anak ni Jimmy Alapag ng Talk N Text.

Tatlong beses na huhugot sa first round ang Burger King na nagrereporma ng kanilang team dahil sila ang nagmamay-ari din ng fourth at ninth pick na nakuha nila mula sa Talk N Text mula sa Yancy De Ocampo trade at dalawang pick sa second round.

Bagamat third pick pa ang Purefoods, sila ang ikalawang pipili dahil ang second pick ay sa nagdisband nang Shell.

Susunod na huhugot ang Burger King, Rain or Shine, Alaska, Red Bull na nakuha nila sa Sta. Lucia kapalit ni Espinas, ikawalo ang Ginebra at Burger King ulit at pinakahuli ang Fiesta Conference champion San Miguel Beer.

Walang first round pick ang Sta. Lucia at Talk N Text.

Gayunpaman unang pipili ang Realtors sa ikalawang round matapos makuha ang 11th pick sa Coca-Cola mula sa Joseph Yeo/ Cesar Catli- Mark Isip trade.

Ang 12 at 13th pick mula sa Purefoods ay sa Red Bull, kasunod ang Burger King na siya ring may-ari ng 20th pick, 15th pick ang Rain or Shine kasunod ang Alaska, Sta. Lucia, Ginebra at Talk N Text. (Mae Balbuena)