Mialnea taghapan sa Yan C Rico sa LLBA Friendship Cup

CEBU, Philippines - Nabugto ang nagkadinang upat ka daog sa Mialnea Stones human mahisugamak ngadto sa Yan C Rico sa nagkainit nga aksiyon sa Lapu-Lapu Basketball Association (LLBA) Friendship Cup 2009 didto sa Villas Magallanes gym sa Sta. Lucia Properties sa Basak, dakbayan sa Lapu-Lapu.

Pakyas ang Mialnea Stones sa ilang tinguha pagharos sa lima ka duwa sa eliminasyon, apan bisan pa niini, pabilin gihapon kining nag-una sa liderato sa ilang 4-1 win-loss record ug daan na sab nga nakaambit og luna sa semifinals.

Ang Yan C Rico nga maoy bugtong koponan nakapilde sa Mialnea Stones gipangulohan ni LLBA president Alan Sepe, kinsa mitusak og 18 puntos, gisundan ni Jun Medina nga adunay 14 puntos, samtang si Sammy Lapoja mihirit og 11 puntos. Ang Mialnea ni league commissioner Alan Yu gipangulohan sab ni Sener Soroño sa iyang 17 puntos.

Sa sayo pa, ang NMC VKK Scuba Divers, nakatilaw na gyud og daog sa labing unang higayon sud sa lima ka duwa pinaagi sa pagbuntog sa Smart Titans sa iskor nga 69-65.

Si Noli Paquibot maoy topscorer sa NMC VKK ni team owner Martinito Villamor nga mirehistro og game-high 27 puntos, samtang si Dan-Dan Ramos mao sab ang nangulo sa Smart Titans nila ni Dr. Michael Ouano ug Dr. Ceniza nga mibugha og 15 puntos.

Sa laing aksiyon, ang John Videoke mi-iskor og 81-76 nga kadaugan batok sa Daniela's Internet Café-Purcia.

Ang Daniela-Purcia ni team manager Billy Nadado ug ang John Videoke ni team manager Lito Magat nga pulos nagbitbit og 2-3 win-loss records subling magsangka karong gabii sa tinaktakay nga duwa alang sa bakanteng luna sa semifinals. 

Ang John Videoke ug Yan C Rico ug NMC VKK mag-ilog sab sa pasaporte sa semifinals.

Nangulo sa John Videoke mao si Pompi Ngujo, kinsa mikimada og 18 puntos, gisundan nilang Magat ug Lungay nga mitampo og 12 puntos matag usa.

Ang naparot nga Daniela-Purcia gipangulohan sab ni Rey Amodia, kinsa mipupo og 19 puntos, samtang si Temor Portugaliza miani og 14 puntos ug si Erne Giganto mitanom og 10 puntos.

Ang LLBA Friendship Cup 2009 gipaluyohan sab ni Hon. Mayor Arturo Radaza uban sa iyang kapikas nga si Brgy. Capt. Paz Radaza, Overseas Courier Service (OCS), COMFA General Merchandise, I3R Motor Parts ug Atty. Rico Amores.

Puntos Matag Usa

Unang duwa:

NMC VKK (69) - Paquibot 27, Romero 20, Orque 14, Aselom 6, Malingin 6, Bardago 3, Odiada 2

SMART TITANS (65) - Ramos 15, Bancali 11, Labrada 10, Aris 10, Gutib 6, Impas 4, Adlit 3, Ouano 2

Ikaduhang duwa:

JOHN VIDEOKE (81) - Ngujo 18, Lungay 12, Magat 12, Simbajon 9, Villamor 9, Dignos 8, Lorena 5, Fuentes 4, Fausto 2, Cuntila 2

DANIELA-PURCIA (76) - Amodia 19, Portugaliza 14, Giganto 10, Augusto 6, Nadado 5, Bontis 4, Eroles 4, Bensi 2, Labadan 2

Ikatulong duwa:

YAN C RICO (69) - Sepe 18, Medina 13, Ochea 12, Lapoja 11, Ybañez 9, Hiyas 6, Cosep 6

MIALNEA (64) - Soroño 17, Bentuzal 8, Temporada 6, Llenes 6, Ybañez 6, Daluz 5, Yu 4, Patalinghug 4, Francisco 2. – BANAT NEWS