Fil-Am sa UV dili makaduwa

CEBU, Philippines - Ang bag-ong Fil-Am sa University of the Visayas (UV) Green Lancer nga si Rene John Saycon, dili makaduwa sa umaabot nga 9th season sa Cebu Schools Athletic Foundation, Inc. (CESAFI) nga gikatakdang sugdan karong Agosto 1 diha sa Cebu Coliseum.

Ang 6-foot-4 nga si Saycon, kinsa usa ka Hawaiian-born ug didto mapalgi sa Asian College of Science and Technology (ACSAT)-Dumaguete, wala tugoti sa screening committee tungod sa kakuwang sa iyang academic deficiency.

Si Saycon mao unta ang bag-ong alas sa UV nga   motimbang ni 6-foot-11 Gregory Slaughter, kinsa daku kaayo’g natabang sa kampanya sa Lancers pagsakmit sa ikawalong korona sa CESAFI sa miaging tuig.

Ang mga line-ups sa CESAFI gisugdan og hagpat niadtong miaging adlaw pinangulohan ni commissioner Felix O. Tiukinhoy, Jr. didto sa buhatan ni Engr. Rolando Villa sa University of Southern Philippines Foundation sa Lahug.

Bisan og dili makaduwa si Saycon, wala kaayo mabalaka si coach Elmer 'Boy' Cabahug kay matud pa niya naa pa sila'y daghang hinagiban nga magamit unya sa gubat sa hardcourt.

Hinuon, maapektohan og gamay ang ilang kampanya ilabi na kay wala na ang ilang beteranong point guard nga si Von Harry Lanete, kinsa atua na karon sa PBL, samtang dili pa mahimong moduwa ang shooting guard nga si Harlow Villanil tungod sa injury.

Ang screening committee wala sab motugot nga makaduwa ang USPF Panthers power forward nga si JR Gulane tungod kay milapas na sa age-limit ingon man usab kang UC Junior Webmasters star forward Roger Pogoy tungod sab sa isyu sa edad.

Ang Cobras adunay upat ka rookies, samtang nag-anam kabata ang University of San Jose-Recoletos (USJR) Jaguars kay aduna kini pito ka rookies ug ang Cebu Webmasters adunay unom ka bag-ong players. – BANAT NEWS