Sa atong panahon karon, nakaseguro ko nga walay magdudula nga gustong mogamit og bawog nga tako sa iyang pagdula og billiard, ilabi na kun mosalmot siya sa usa ka dakung torneyo diin gitagana ang dakung ganti.
Matawag tang natural lang kun ang usa ka magdudula magaandam sa labing maayo niyang kahimanan sa dula kun siya mosalmot og torneyo. Iyang seguroon nga ang tako nga iyang gamiton mohaom sa iyang estilo sa dula aron dili bakikaw alang kaniya ang pagpahigayon og tayada sa bisan unsang posisyon.
Ug labing seguro, iyang sutaon kun wala bay depekto ang iyang tako. Iya gyud kining ibutang sa cue case o cue rack aron pagseguro sa katanos o katul-id niini. Kay alang sa usa ka magdudula, ang bawog nga tako maoy usa ka kapildihan.
Pero kapid-an na ka katuigan ang nakalabay, adunay bilyarista nga hanas kaayong mogamit og tako nga bawog. Siya mao si John Spencer. Segun sa iyang pangangkon, bation niya ang dakung kapildihan kun mogamit siya'g laing tako sa iyang pagdula. Naanad man gud siya sa bawog nga tako.
Ang billiard career ni Spencer usa ka hulagway sa kalampusan. Ang iyang kadaugan sa duha niya ka titulo sa kampiyonato iyang gigamitan sa bawog niya nga tako. Daghan ang nagtuo nga mapakyas si Spencer pagsakmit sa maong mga titulo tungod lagi kay bawog man ang iyang tako nga iyang gigamit. Pero milampos gyud siya, butang nga nakapahingangha sa daghang billiard aficionados.
Gihisgutan ko kini, dili aron inyong sundogon ang gibuhat ni Spencer nga mao ang paggamit sa bawog nga tako. Gituki ko kining butanga aron pagpalutaw sa kamatuoran nga mas maayo gyud nga maoy inyong gamiton ang tako nga maoy inyong naandan kun kamo mosalmot og torneyo. May dakung bentaha diha sa pagbaton og kaugalingong tako nga mohaom sa imong estilo sa dula kay sa manggamit ka lang sa bisan unsang tako.
Ang tako importante sa kinabuhi sa usa ka bilyarista. Kinahanglan gyud nga magbaton ka niini kun maoy imong tuyo nga mas epektibo ang imong pagdula. Sama kang Spencer, daku ka'g purohan nga modaog sa torneyo kun gamiton mo ang kaugalingon mong tako, bisan pa'g lokal kaayo kini sa pagtan-aw sa uban.
* * *
(Mga sugyot ug pakisayod? Text sa 0910-8105522)