STC Run-Move with AIR plansado na

CEBU, Philippines – Plansado na ang tanan alang sa St. Theresa's Run-Move with AIR nga mosikad karong Hulyo 19 diha sa St. Theresa's College (STC) grounds.

Ang lumba nga naglangkub sa 5K Executive, 5K Opens, 3K Open ug 300-meter kiddies fun run sugdan sa alas-6 sa buntag.

Matud pa ni race organizer ug The Freeman sports columnist Raffy Uytiepo, nga gawas sa mga alumni ug estudyante nga mosalmot sa lumba, magtigi usab ang mga dekalibreng runners sa Sugbu sama nila ni Madelyn Carter ug Mendel Lopez, kinsa maoy   nakampiyon sa Cebu leg sa 33rd National Milo Marathon ning bag-o.

 Modagan usab si John Phillip Dueñas ug ang managsuong Delposo nga sila si Eugene ug Joel.

Lakip sa mga sikat nga personalidad nga mikompirmar sa ilang partisipasyon mao sila si TV anchor Haydee Acuña, Tinago Brgy. Councilor Joel Garganera, Lahug Brgy. Captain Mary Ann De los Santos ug ang running couple nga sila si Dr. Yong Larrazabal ug Donna-Cruz Larrazabal.

Mga ganting salapi ang nagpaabot alang sa mga mananaog sa matag dibisyon.

Ang makampiyon sa 5K makadawat og P3,000, samtang ang makampiyon sa 3K mobulsa og P2,000.

Ang deadline sa registration hangtod lamang sa Hulyo 15. Ang registration fee nagkantidad og P200 alang sa 5K, P150 sa 3K ug P85 alang sa mga estudyante sa STC.

Mahimong magparehistro sa   STAA Office, Philippine Sports Commission Office, Athletes Foot sa Ayala Mall , Yayoy's Grill ug Casa Ilongga sa Robinson's Place-Cebu. – BANAT NEWS