CEBU, Philippines – Ang garbo sa ALA Stable nga si Mark Jason Melligen miharos og daog sa tulo niya ka duwa didto sa Amerika karong tuiga sa impresibong pamaagi, apan gikatakda pa siyang mo-atubang og malisud nga hagit aron kapamatud-an ang iyang katakus.
Kini way lain kun dili ang umaabot niyang sangka batok sa bangis nga Mehikanong si Michel 'El Bravo' Rosales sa undercard sa interim WBA super flyweight championship bout tali nilang Nonito 'The Filipino Flash' Donaire ug Panamian Rafael 'El Torito' Concepcion karong Agosto 15 didto sa Hard Rock Hotel and Casino sa Las Vegas, Nevada.
Way duda nga si Melligen adunay dekalibreng abilidad ug gani gitamnan niya og black-eye si Floyd Mayweather Jr. atol sa ilang sparring. Apan way duda sab nga si Rosales usa ka maidlot nga tunok sa ilang dalan ngadto sa kalampusan.
Nagbarog sa gitas-on nga lima ka tiil ug 11 ka pulgada (5-foot-11), ang 26-anyos nga si Rosales usa ka certified knockout artist gumikan kay 21 man sa 24 niya ka mga biktima ang iyang gipatikangkang.
Apan dunay usa ka butang nga angayan nga ikalipay ni Melligen. Kini kay si Rosales nakasinati og tulo ka pilde ug pulos pinaagi sab sa knockout.
Hinuon duna pay laing angayan nga panaminan ang 23-anyos nga si Melligen gumikan kay si Rosales taas og upat ka pulgada kaniya, mas daku ug mas bug-at.
Sa dihang nahinabi usa ka adlaw sa iyang pag-abot sa Amerika sa miaging semana, si Melligen way kurat nga namahayag nga wala siya mahadlok bisan kinsa ang sunod niyang makontra basta sakto lamang siya sa training ug conditioning.
Labaw sa tanan, nagabaton man sab siya og mura'g bato nga kumo timaan niini ang pagpatukay-ang niya og 11 sa 15 na ka mga boksidor nga iyang gibihag. – BANAT NEWS