CEBU, Philippines – Bag-ong world record ang mapatik diin 7,770 ka Cebuano juveniles milampos sa ilang pagsayaw sa tinguha nga ilang mabuak ang kasamtangan rekord nga labing daghang dance class sa Guinness Book of World Records kagahapon didto sa nagsugwak nga Cebu City Sports Center (CCSC) grounds.
"This is the highest point of the Cebuano spirit of volunteerism. It’s an indescribable feeling of pride and honor to see such momentous event for Cebu . This is a historic event, not only for Cebu, but also for the Philippines and the world as well," matud pa ni Edward Hayco, ang tawo nga nagpaluyo sa dancesports dinhi sa Sugbu.
Mga inila ug prominenting mga tawo dinhi sa Sugbu lakip na si Cebu City Mayor Tomas Osmeña ang misaksi sa maong kalihukan, kinsa nalingaw ug nalipay tungod sa kadaghan sa mga partisipante.
"This is the highest accomplishment to make our youth to be proud to be a Cebuano," matud pa ni Osmeña.
Mitambong sab sa maong kalihukan mao si ABS-CBN tv host ug newscaster Korina Sanchez, kinsa maoy nihatag og ideya ug midasig sa DTCC sa pagsuway og buak sa rekord nga kasamtangan karong gihuptan sa Budapest, Hungary nga adunay 2,289 ka entrante.
"This would be an honor to achieve the world record. This would even inspire us to support dancesport,” matud pa ni Philippine Sports Commission (PSC) Executive director ug Commissioner Fr. Vicente Uy, kinsa mituyo pag-anhi alang sa maong dakung kalihukan.
Ang 6-anyos nga si Marie Antonette Espina, maoy labing bata nga misayaw ning makasaysayanon nga kalihukan dinhi sa Sugbu ug daku niyang garbo nga nakahimo siya sa pagsalmot sa makasaysayanon nga kalihukan.
Matud pa ni Hayco nga ila na nga gihipos ang tanang kinahanglanong dokumento nga ilang iduso ngadto sa Guinness Book of World Records nga maoy rekisito.
Kun walay kakulian ug ma-aprobahan sa Guinness, ang Cebu ilhon nga Dance Capital of the World.
Atol sa pasundayag kagahapon, adunay lima ka cameras ug lima ka video cameras nga gimontar aron pagdokumento sa kalihukan.
Nasayran, wala kaabot og usa ka bulan ang praktis sa mga partisipante sa ilang pagpangandam niining kalihukan gi-organisar sa DTCC uban sa suporta sa M. Lhuillier Kwarta Padala ug sa DepEd Cebu City.
Mipasundayag sila og Sugbo dance, chachacha, mambo ug jive sud sa 10 minutos. – BANAT NEWS