CEBU, Philippines – Duha ka mga batos sa ALA Boxing gym nga sila si Mark Gil Melligen ug Rocky Fuentes parehong misaad nga tumbahon ang ilang tagsa-tagsa ka kaatbang sa main event sa “Fight Night Boxing Tour” karong alas-7 sa gabii diha sa Mandaue City Plaza Square.
Si Melligen (9-3-1, 3KOs) mag-atubang og lisud nga tahas kay ang iyang sangkaon mao man si kanhi WBC International bantamweight champion Roger Galicia (23-9-4, 7KOs) sa Tiger City Gym sa Mandaluyong, samtang ang knockout artist nga si Fuentes (23-6-2, 13KOs) makigbinukbukay ni Allan Ranada (7-20-1, 6KOs) sa Dr. Cagulada Stable nga nagbasi sa Bohol.
Sila si Melligen ug Fuentes pulos mikulit og impresibo nga kadaugan sa katapusan nilang away.
Si Melligen mi-iskor og second round stoppage ni Rommel Libradilla niadtong Hulyo 12 sa miaging tuig didto sa Negros University Gym, samtang si Fuentes midaog pinaagi sa unanimous decision batok ni Eric Rapada aron magpabilin sa iyang kamot ang Philippine flyweight title niadtong miaging Marso 21 didto sa Negros Occidental Multi-Purpose Activity Center (Nompac) sa Bacolod.
Sa special attraction, si Jun Intor sa Mabinay, Negros Oriental makigbinukbukay batok ni Roldan Malinao sa Butuan City sa usa ka four-rounder match ubos sa super bantamweight division.
Mokompleto sa undercard mao ang away ni Marjhun Macahilig sa Kalibo, Aklan batok Michael Espinosa sa Bacolod, Leo Torres sa Eastern Samar batok Powell Balaba sa Tagbilaran, Jomar Cordinillo batok JR Salvador sa Phil-Aust Gym sa Mandaue ug Melchor Abcede sa Tagbilaran batok ni Jherpol Valero sa Phil-Aust Gym.
Ang maong boxing event gipasiugdahan sa ALA Promotions ug Summit Natural Drinking Water.
Sa laing bahin, si ALA Promotions Vice President Dennis Cañete ug Summit Drinking Water Senior Brand Manager Henry Simon milab-as sa ilang partnership atol sa press conference kagahapon didto sa Sugbahan Restaurant sa A.S. Fortuna St., dakbayan sa Mandaue.
Ang Summit Fight Night Boxing Tour nga matapos Oktubre 2010, dad-on sab sa mga nag-unang dakbayan sa Visayas ug Mindanao sama sa Tagbilaran, Cagayan de Oro, General Santos, Bacolod, Davao ug Iloilo. – BANAT NEWS