Burger King motumba sa San Miguel

CEBU, Philippines – Paningkamotan sa Burger King Whoopers nga modaog karon aron ilang mapatabla ang serye sa 2-2 batok sa San Miguel Beermen sa Game-4 sa ilang “best-of-seven” semifinals series sa 2009 Motolite-PBA Fiesta Conference didto sa Araneta Coliseum.

Sa dili pa ang ilang engkuwentro sa alas-7:30 sa gabii, magsangka una ang Rain or Shine Elasto Painters nga gipangulohan ni Gabe Norwood ug Barangay Ginebra Kings sa alas-5:00 sa hapon.

Ang Rain or Shine naglaraw nga mopukan sa Ginebra aron ilang maangkon ang 3-1 nga bentaha.

Human makatagamtam og pait nga kapakyasan sa Game-3 dihang gilubong sila sa San Miguel, 100-88, ang Burger King nabutang karon sa peligro ug kinahanglan nilang dag-on ang duwa karon aron mahayagan ang ilang pangandoy nga mo-abante sa sunod hugna.

Aron molampos, kinahanglan nga ilang pugngan ang no. 1 scorer ug import sa Beermen nga si Gabe Freeman.

Si Arwind Santos gipaabot nga maoy mogiya sa Burger King uban sa ilang import nga si Shawn Daniels.

Laing suliran nga giatubang sa Burger King mao ang posibleng pagkasuspenso sa ilang coach nga si Yeng Guiao human pahamtangi og silot tungod sa pagpunay niini og reklamo.

Gawas ni Guiao, laing tulo ka magduduwa nga sila si Wesley Gonzales sa San Miguel ug Mark Yee sa Burger King ang mag-atubang og silot human sa nahitabong lamok-lamok niadtong Domingo.

Lakip sa posibleng mag-atubang og sanction mao si Cyrus Baguio sa Ginebra Kings tungod sa flagrant foul niini ngadto sa guwardiya sa Painters nga si Ryan Araña. – BANAT NEWS