CEBU, Philippines - Ang Swiss tennis star nga si Roger Federer nagtinguha karon sa iyang ika-unom nga korona sa Wimbledon nga mao unya’y iyang ika-15 nga major championships sa iyang career.
Ang Wimbledon ipahigayon ugma, Hulyo 23 hangtod na ngadto sa Hulyo 5 didto sa London,England.
Nagtinguha sab karon si Federer sa pagbuak sa record nga nahimo ni Pete Sampras sa Estados Unidos kinsa adunay 14 ka korona sa major championships.
Si Federer mipakurat kang Sampras kinsa maoy no. 1 sa world rankings atol sa ilang sangka kaniadtong Hulyo 2, 2001 diin si Federer 19 anyos pa niadtong tungora ug si Sampras 29 anyos.
Kaniadto matud pa ni Federer, mohilak siya matag higayon siya mapilde sa dihang usa pa siya ka junior player apan sukad iyang napilde si Sampras, mohilak siya matag higayon nga siya modaog.
"Crying after a victory is something that started when I beat Pete", matud pa niya.
Mismo si Sampras nagkanayon sab kaniadto nga dili madugay makakuha’g 15 ka korona sa major championships si Federer.
Ang Wimbledon defending champion nga si Rafael Nadal sa Spain dili mosalmot karong tuiga tungod sa nagngulngol niyang tuhod. Mipahibawo sila sa iyang pag-undang sa umaabot nga Wimbledon kaniadtong Biyernes nga naghimo kaniya nga ikaduhang men’s champion sulod sa 35 ka tuig nga miluwat sa maong torneyo.
Iyang gipahibalo ang iyang pagluwat human siya mapilde ngadto sa 18th-ranked nga si Stanista Wawrinka sa usa ka exhibition game sa grass court didto sa Hurlingham Club sa South London.
Gipukan ni Nadal si Federer sa miaging tuig sa usa ka halandumong sangka nga natapos alas 9 sa gabii ug nag-anam kangitngit ang palibot sa grass court didto sa Wimbledon.Ang maog kapildehan maoy nagputol sa 40 ka sagunson nga daog ni Federer. - Gabby G. Malagar (BANAT NEWS)