CEBU, Philippines – Nangayo pa og overtime ang John Jacob una nila maangkon ang 95-93 nga kadaugan batok sa Christian sa ilang kulbahinam nga Game-1 sa "best-of-three" finals sa juniors division sa Lorega Echavez Youth Council (LEYC) basketball tournament didto sa Lorega Sports Complex, ning siyudad.
Si Jack-Jack Echivaria mibugha og 28 puntos aron pangulohan ang John Jacob, kinsa nagkinahanglan na lang og usa ka daog aron masakmit ang kampiyonato. Si Lyle Libongcogon mipabuto og 22 puntos, samtang si Bryan Ruelan miamot og 13 puntos.
Ang pilderong Christian gipangulohan ni Maxxie Beldoro, kinsa miposte sa iyang career-high 33 puntos, apan dili kini igo aron baswaton ang iyang koponan sa kadaugan.
Mipabuhagay dayon sa ilang init nga opensa ang Christian sa pagpangulo nilang Beldoro ug Mertilino kinsa nagkumboya og 20 puntos aron hatagan ang ilang koponan og siyete puntos nga labaw sa halftime, 34-27.
Hinuon, mibawos ang John Jacob pinaagi sa paglusad og 10-0 run sa nahabiling 5:03 sa third period aron kawaton ang labaw , 48-44 padulong ngadto sa final period.
Ang turn-around jump shot ni Beldoro sa katapusang 3.7 segundos sa final period mao unta ang motukmod sa Christian ngadto sa kadaugan, apan mikagar kini hinungdan sa overtime. Nahuman ang regulasyon sa iskor nga 75-all.
Padayon ang init nga kumbati sa duha ka koponan ug nagsinukliay kini sa ilang mga opensa hangtod nga si Libongcogon mipasulod sa iyang duha ka free throws sa nahabiling dos segundos nga maoy mikandado sa kadaugan sa John Jacob.
Puntos Matag Usa
John Jacob (95) - J. Echevaria 28, L. Libongcogon 22, B. Ruelan 13, T. Echevaria 12, W. Flordiles 7
Christian (93) –M.Beldoro 33, J. Bughao 13, E. Mertilino 13, N.Loyola 10, J.Entera 9 – BANAT NEWS