2-0 tuyo sa Lakers, Kobe baylehon

CEBU, Philippines - Human ilubong og 25 puntos sa Game 1, walay laing sulbad ang Orlando Magic karong adlawa kun dili baylehon ug maayo si Kobe Bryant aron likayan ang Los Angeles Lakers nga magtangag og 2-0 nga labaw didto sa Staples Center sa Los Angeles, California.

Ang Lakers kinsa midaog sa Game 1 sa iskor, 100-75, way laing tumong karong adlawa kung dili mao ang hapsay nga 2-0 nga record sa pagtapon didto sa balwarte sa Magic ang Amway Arena sa Orlando, Florida alang sa mosunod nga tulo ka duwa.

Dili makatugot ang Lakers nga makatabla sa 1-1 ang Magic kay kung maharus sa Magic ang tulo ka duwa, lain na usab nga kapakyasan ang mahiagoman ni Bryant sa iyang damgo nga mohakot sa iyang ika-upat nga korona samtang nagduwa sa Lakers.

Hugot ang pangangkon sa Magic nga wala sila batia og bisan gamay nga kakurat bisan gipanitan sila sa Game 1 ug matud pa nila, depensa ra maoy tambal ni Bryant karon aron kapugngan siya sa Game 2.

Maayong laraw. Ang pangutana kung unsaon nila paghimo ug posible ba kaha himoon? Si Howard ug kaubanan maoy makatubag niini ug anaa ni coach Stan Van Gundy ang labing dakung tahas.

Si Bryant daw naghuramentado sa Game 1 dihang mi-iskor kini og final career-high 40 puntos. Kung kapugngan si Bryant ug ingon man si Pau Gasol, mahimong dili na sila malubong og maayo ug aduna pa gani posibilidad nga modaug sa ilang road game pareho sa ilang pagdaog batok sa Cleveland Cavaliers.

Ang Magic kinsa naleksiyon sa ilang kapildehan sa Game 1, mohimo og gamay nga adjustment o kausaban ilabi na sa ilang depensa apan dili kini mahimong iyagyag nila sa publiko.

Matud pa sa ilang numero unong bench player nga si Mickael Pietrus kinsa maoy nangu sa Game 1 sa iyang 14 puntos, aduna sila'y himoon nga depensa alang ngadto sa tanang taga Lakers.

“I’m not going to give you my game plan. People read the news, so it’s all about team,” matud pa ni Pietrus.

Siya midugang pinaagi sa pag-ingon nga “Sometimes you have to sat stuff and sometimes you have to keep stuff for yourself. But we’re going to make some changes, so hopefully guys are going to see it.”

Ang 2009 NBA Finals tali sa Lakers ug Magic, gitandi sama sa managribal nga Disneyland ug Disney World. Ang Disneyland tua mahimutang sa Anaheim dili layo sa Los Angeles, California ug ang Disney World tua mahimutang sa Orlando, Florida.

Matud pa, ang walay gidapigan kanilang duha mao si Mickey Mouse, ang numero unong character sa duha ka dakung kalibotan sa entertainment.