Pampanga buddy gipabuthan sa CESAFI selection

CEBU, Philippines - Ang 6-foot-9 nga sentro sa University of Cebu (UC) Webmasters nga si June Mar Fajardo miposte og 16 puntos aron aswatun ang CESAFI Selection batok sa Pampanga-Smart Buddy, 77-73 sa opening game sa Friendship Cup kagahapon didto sa Cebu Coliseum.

Nahimong sikit og kulbahinam ang duwa ug naglabaw lang og tres puntos ang CESAFI selection sa pagtapos sa first-half, 37-34, ang medium range jumper ni Fajardo ug ang tres ni Kurt Amores sa University of San Jose Recoletos maoy mihatag og 68-65, nga labaw ni coach Dodie Miego sa nahibiling 4:39 sa payoff period.

Ang drive ni Aard Diango maoy miinat sa labaw sa host team, 72-67, apan human sa duha ka turn-over sa CESAFI selection, ang bisitang Pampanga mikitkit sa labaw ngadto sa dos puntos, 75-73, dihang gipasulod ni Ern Saguindel ang iyang duha ka free-throw sa nahibiling 34.9 segundos sa duwa apan si Kevin Quilantang ug Amores misigurado sa daog dihang nihimo sab sila sa kaugalingon nilang free-throw.

Ang CESAFI Selection naglaraw karong mokulit sa ikaduha nilang daog dihang sangkaon nila ang beteranong Cebu Landmasters.

Gawas ni Fajardo, sila si Diango ug Eleazar Armecin kinsa pulos gikan sa Southwestern University, mikulit usab og double figure alang sa CESAFI Selection.

Si Anthony Espiritu miposte ug 17 puntos aron pangulohan ang Pampanga Buddies, samtang ang kanhi Ateneo forward nga si Ford Arao midugang og 16 puntos ug ang ex-PBA cager nga si Niño Gelig mihungit og 11 puntos.

Puntos matag usa :

CESAFI Selection (77)- Fajardo 16, Diango 12, Armecin 10, Pao 8, Amores 6, Pacquaio 6, Abella 5, Pateño 4, Quilantang 4, Villaver 2, Bibera 2, Duran 2.

Pampanga (73)- A. Espiritu 17, Arao 16, Gelig 11, Alfad 6, Luanzon 6, Bansil 5, Saguindel 4, Vizcara 3, Baluyo 3, Espiritu 2. – BANAT NEWS