Lomar Shaggy, John Jacob sulod sa finals

CEBU, Philippines – Miabante na ngadto sa finals ang Lomar Shaggy ug John Jacob human sa ilang kadaugan batok sa tagsa-tagsa ka kaatbang sa Lorega Echavez Youth Council (LEYC) basketball tournament diha sa Lorega Sports Complex, ning siyudad.

Ang Lomar Shaggy miharos sa   best-of-three semifinal series batok sa Carolinians,103-96 aron pag-angkon og lingkoranan sa finals sa midget division, samtang ang John Jacob mi-sweep sab sa Trisha, 93-83 sa juniors division.

Si Jerame Ingente ug Michael Ledesma    nagkumboya og 50 puntos aron pangulohan ang Lomar Shaggy. Si Ingente mi-iskor og 26 puntos, samtang si Ledesma miratsada og 24 puntos.

Sa naandan, si Sven Deo mao na usab ang topscorer sa Carolinians pinaagi sa iyang 29 puntos, gisundan ni Williams Entera sa iyang 21 puntos ug ni Vincent Dumasig nga adunay 16 puntos, apan nakawang ang ilang mga paningkamot kay kulang kini og suporta gikan sa ilang kaubanan.

Ang 38-15 nga rally nga gihimo sa Lomar Shaggy sa giya nilang Ledesma ug Deo Gimeno sa third quarter   daku'g natabang sa ilang koponan pag-angkon og pasaporte ngadto sa finals.

Sa laing bahin, si Jack-Jack Echivaria miposte og 34 puntos aron pangulohan ang John Jacob, si Lyle Santos midiga og 12 puntos ug si Timoy Echevaria adunay nuybe puntos.

Ang pilderong Trisha gipangulohan ni Jayson Manano nga mipabuto og 22 puntos, gisundan ni Ronie Dinopol pinaagi sa iyang 19 puntos.

Puntos Matag Usa

Unang duwa:

Lomar Shaggy (103) - J. Ingente 26, M. Ledesma 24, D. Gimeno 12, N. Manal 11, M. Cabrera 8

Carolinians (96) - S. Deo 29, W. Entera 21, V. Dumasig 16, F. Herrera 7, E. Antiporta 5

Ikaduhang duwa:

John Jacob (93) - J. Echevaria 34, L. Santos 12, L. Flordiles 12, T. Echevaria 9, Warren Lazo 9

Trisha (83) - J. Manano 22 , R. Dinopol 19 , A. Olieta 9, A. Robles 8, R. Robles 5 – BANAT NEWS