Inoc misakmit sa ikaduhang expert title

CEBU, Philippines – Naangkon ni Paolo Inoc ang ikaduhang titulo sa expert class sa 11th leg sa 3rd MS Motosuit Motocross Series nga giulohan og "1st Mayor Duke Frasco Motocross Cup" niadtong Domingo didto sa Jubay, Lilo-an.

Si Inoc, kinsa nilangkat sa iyang unang titulo sa expert atol sa 7th leg didto sa San Remigio niadtong miaging bulan, mipukan ni Jubenile Abellar alang sa unang dapit, samtang ang miaging leg winner nga si Jon-Jon Adlawan napunta sa ikatulo nga dapit.

Nakabawi hinuon si Abellar sa iyang kapildihan sa expert category pinaagi sa paghari sa intermediate class batok sa managsuong Ambo ug Weng Yapparcon.

Mikatkat og balik sa kinatas-ang dapit si MS Motosuit image model John Flores human matagak sa 10th leg pinaagi sa pagdominar sa novice production class.

Gipukan ni Flores si Donkey Sanchez, samtang si Ryan Querol nalandig sa ikatulo.

Wala hinuon mabalaka si Sanchez nga napilde ni Flores kay nidaog na siya og titulo sa beginners open production, local enduro ug sa open enduro.

Si Querol mipahiluna sa ikaduha sa beginners open ug si Bonnie Bustillo sa local enduro. Si Ayen Ledesma ikatulo sa beginners open production ug sa open enduro.

Sa laing bahin, si Jun Enriquez mirehistro og double victory sa paghari sa executive A ug B.

Napuhalan ni Enriquez si Nonoy Reluya ug reigning rider of the year Seigfred Ornopia sa executive A ug iya usab nga nalabwan ang abilidad ni Aloy Igot ug Gener Sicad aron paghari sa executive B. Ang executive C gidominar ni Butch Flores, gisundan nilang Titing Sicad ug Sergio Chua nga miangkon sa ikaduha ug ikatulo nga dapit.

Gidominar sab ni Earl Jean Brylle Ornopia ang mini class pinaagi sa pagpukan nilang Tomtom Largoza ug BJ Pepito nga mi-okupar sa ikaduha ug ikatulo nga dapit.

Dali sab hinuon nga nakabawi si Flores dihang iyang gilangkat ang titulo sa peewee 7-under batok nilang Marianne Pepito ug Joseph Enriquez.

Ang 11th leg nga gipresentar sa Castrol Philippines gipaluyohan sab ni Lilo-an Mayor Duke Frasco ug Jubay Brgy. Capt. Manuel Wagas. – BANAT NEWS