Laing binakbakay sa Cebu Coliseum

CEBU, Philippines – Lain na sab nga eksplosibong binakbakay ibabaw sa ring ang masaksihan sa mga Sugbuanon sa ipahigayong triple World Boxing Organization (WBO) regional championship ugma sa gabii diha sa Cebu Coliseum.

Sa main event ning maong showdown nga gipasiugdahan sa SGG Sports Promotions ni international promoter Sammy Gello-ani ug Kokiet Boxing Stable sa Thailand, si Ramie Laput (37-3, 20KOs) mosugal sa iyang WBO Inter-Continental junior featherweight title batok ni kanhi world champion Ratanachai Sor Vorapin (74-11, 49KOs).

Si Laput niaway na dinhi sa Sugbu diin nidaog siya sa RP championship sa wala pa niya malangkat ang WBO Interim Asia-Pacific crown pinaagi sa pagpaundang sa ikatulong round ni Thai Mongkolchai Singmanasak niadtong Oktubre sa miaging tuig.

Si Laput nidaog sa WBO Intercon 122-pound title pinaagi sa unanimous decision batok ni Donreil Marcos.

Sa supporting bouts, sila si Marvin 'Marvelous' Sonsona ug si Johnreil Casimiro makigsinukliay sab og kumo batok sa ilang managlahing kaatbang.

Ang walay pildeng si Sonsona (12-0, 11KOs) moaway alang sa WBO Oriental flyweight title batok ni kanhi two-time world titlist Wandee Singwancha sa Thailand, samtang si Casimiro mosugal sa iyang WBO Asia-Pacific light flyweight title batok ni Arden Diale sa Dante Almario Stable.

Lain pang atngan mao ang away ni knockout artist Anthony 'Rocky' Marcial (14-0, 13KOs) batok ni Jack de Asis sa ten-rounder, samtang si ex-WBO Asia-Pacific title-holder Jason Egera makigsangka batok sa Thai boxer Pramunsak Phosuwan sa walo ka hugna nga kumbati. – BANAT NEWS