SWU mitabla sa series

CEBU, Philippines – Init nga gisugdan sa Southwestern University (SWU) Cobras ang first quarter pinaagi sa ilang 18-2 nga rally aron pag-iskor og 90-76 nga kadaugan batok sa CCC-CSD Builders aron pagpuwersa ngadto sa rubbermatch sa ilang “best-of-three” finals series sa 1st Vice Mayor Rudy Espinosa Cup niadtong Martes didto sa Barba Sports Complex sa dakbayan sa Toledo.

Wala nakapiog sa pagmangtas ni Aard Diango, kinsa maoy nangulo sa opensa sa Cobras sa iyang 22 puntos.

Pakyas ang Builders sa ilang 2-0 sweep kay wala moduwa ang ilang back-up guard nga si Michael Sereño.

Nangigo sab sa gawas sila si Chris Litorja ug Eleazar Armecin nga nakapalagsik sa duwa sa Cobra. Si Litorja mipupo og 16 puntos, samtang si Armecin ug ang big man nga si Gilbert Gallarde midonar og 13 puntos matag usa.

Nidominar sab si Gallarde sa rebounding department bisan pa sa presensiya sa mga tore sa CSD nga sila si Franklin Nailon ug Danny de los Santos. 

Si Sherwin Abobo maoy nangulo sa Builders pinaagi sa iyang 19 puntos, samtang si Nailon miamot og 15 puntos.

Ang defensive guard nga si Jared Kane Abatayo mi-iskor og 13 puntos ug si Jerry Jaca miposte og 11 puntos alang sa Builders.

Sa sayo pa, ang CSD Staff milubong sa Black Blows sa iskor nga 102-89 aron pagdaog sa korona sa Inter-Ballclub division.

Puntos Matag Usa

SWU (90) - Diango 22, Litorja 16, Armecin 13, Gallarde 13, Pria 10, Pacquaio 8, Jalandoni 4, Divinagracia 2, Caytona 2

CCC-CSD (76) - Abobo 10, Nailon 15, Abatayo 13, Jaca 11, Delos Santos 7, Ocañada 7, Mangyao 2, Sayson 2 – BANAT NEWS