Nuggets ug Cavaliers 3-0 na

Giluwas ni Carmelo Anthony ang Denver Nuggets pinaagi sa pagpasulod sa iyang last-second three-point shot aron baswaton kini ngadto sa 106-105 nga kadaugan batok sa Dallas Mavericks ug milansang og 3-0 nga abante sa ilang Western Conference semifinals didto sa American Airlines Arena sa Dallas, Texas.

Nagtangag sab og 3-0 nga baraha ang Cleveland Cavaliers human ilang gilubong ang Atlanta Hawks sa Game 3 sa ilang East semis sa iskor, 97-82 didto sa Quicken Loans Arena sa Cleveland, Ohio.

Naglabaw pa unta ang Mavericks, 105-101 may 31 segundos ang nahibilin apan nakakawat og kalit nga dunk si Anthony gikan sa inbound ug misikit ang Denver, 103-105 may otso segundos pa ang nahiblin.

Sa sunod possession, nakatira pa gyud si Anthony ug three-point shot aron mahimong bayani sa Nuggets. Si Anthony mi-iskor og 31 puntos samtang si Chauncey Billups maoy nangu sa Nuggets sa iyang 32 puntos ug si Nene Hilario midugang og 24 puntos.

Mi-iskor og 12 puntos si Kenyon Martin ug gikan sa bench mi-iskor si JR Smith og 10 puntos.

Samtang nagbahis sa kalagot sa mga referees ang tag-iya sa Mavericks nga si Mark Cuban, nakasaway sab kanila si coach Rick Carlisle human sa duwa pinaagi sa pag-ingon “Officiating has to be a science, not an art. If I sit here and belabor this it’s not going good for our league. It’s one of those times where it’s really an unfortunate thing.”

Si Billups sa iyang bahin nagkanayon “We know it would be a hard-fought game, four-game. We just stayed with it. We came up with a great win.”

Si Dirk Nowitzki maoy nangu sa Dallas pinaagi sa iyang 33 puntos ug 16 ka rebounds.

Sa laing bahin, si LeBron James mi-iskor og career playoff high 47 puntos uban ang iyang 12 ka rebounds ug walo ka assists ug laing tulo ka teammates mi-iskor og double figures.

Sila si Joe Johnson ug Josh Smith maoy nangu sa Hawks pinaagi sa ilang 21 ug 18 puntos ug gikan sa bench, mi-iskor si Flip Murray og 17 puntos.

Tungod sa kainit sa mga kamot ni James, bisan ang iyang mga kaatbang sa Hawks nga sila si Johnson ug Zaza Pachulia nakadayeg kaniya.

“Lebron was just out of his mind tonight,” matud pa ni Johnson samtang si Pachulia mi-ingon “He’s not the MVP for nothing. He’s the best player in the league. He know when to push the gas. That’s what he did.” - Gabby G. Malagar (BANAT NEWS)