MANILA, Philippines – Matapos ang tatlong sunod na kamalasan, nakatikim na rin ng panalo ang Tropang Texters.
Mula sa game-high 34 puntos ni Panamanian import Gary Forbes, tinalo ng Talk ‘N Text ang dating mabangis na Coca-Cola, 103-100, sa classification round ng 2009 PBA Fiesta Conference kahapon sa Calape Sports Complex sa Bohol.
Galing sa 72-79 agwat sa third period, sumandig ang Tropang Texters kina Forbes, Ali Peek, Mac Cardona at Yancy De Ocampo para buhayin ang kanilang tsansa sa wildcard phase.
Samantala, tatargetin naman ng nagdedepensang Barangay Ginebra ang kanilang pang anim na sunod na panalo para palakasin ang kanilang tsansa sa isang outright semifinals seat.
Kung hindi man sila palarin sa semis, ipina-panalangin ni coach Jong Uichico na huwag mahulog sa No. 9 spot ang kanyang Gin Kings.
Sasagupain ng Gin Kings ang Giants ngayong alas-6:30 ng gabi matapos ang salpukan ng Beermen at Whoppers sa alas-4 sa classification phase ng 2009 PBA Fiesta Conference sa Araneta Coliseum.
Sa inisyal na laro, ha-ngad naman ng Beermen na masikwat ang unang outright semis berth sa pakikipagkita sa Whoppers.
Ang koponang uupo sa No. 3 at 4 slots ang magkakaroon ng ‘twice-to-beat’ advantage sa wildcard phase laban sa No. 9 at 10, ayon sa pagkakasunod, matapos ang classification round. (Russell Cadayona)