AMBL midaog sa Alcover sa BAR-VM Rama Cup

CEBU, Philippines – Gipukan sa AMBL Enterprises ni team owner Allan Lim ang Alcover Blessel, 104-97 aron tapuson ang elimination round bitbit ang 7-1 nga baraha sa Basketball Association of Ramos (BAR) Vice Mayor Mike Rama Cup didto sa Benjamin Solon Memorial Gym sa barangay Cogon-Ramos, ning siyudad.

Ang AMBL ni coach Amor Ciabo, kinsa nagkamang sa pagsugod, apan hinay-hinay kining nakarekober ug mao na ang nagkontrolar sa duwa human nabugto ang panagtabla, 93-all sa nahabiling 2:40 sa duwa.

Ang kanhi shooting guard sa CCC (nga karon UC) nga si Robert Abasolo, kinsa maoy nakatabang aron makakuha’g 31-25 nga abante ang AMBL sa first period, maoy topscorer sa maong kadaugan pinaagi sa iyang 26 puntos, gisundan ni Marlou Monreal nga adunay 25 puntos.

Gipahinungod ang maong kadaugan ngadto ni Yokyok Alesna, kinsa nagsaulog sa iyang adlaw'ng natawhan atol sa maong duwa. Si Alesna miamot og 12 puntos alang sa AMBL.
Ang Alcover team nga maoy nilabaw sa halftime, 57-47, gipangulohan ni Lemar Alcover, kinsa mibugha og 27 puntos, si Eldy Monterroyo miabuno og 22 puntos, samtang si Edwin Yares mitampo og 20 puntos. 

Puntos Matag Usa

AMBL (104) - Abasolo 26, Monreal 2,5 Lim 10, Alesna 12, Navarro 10, Quiroz , Sullano 4, Piñas 2

Alcover (97) - Alcover 27, Monterroyo 22, Yares 20, Camoa 15, Esplanada 5,.Booc 4, Veloso 2, Dela Victoria 2  – BANAT NEWS