Ave Maria Sanctuary Park milubong sa ilang ikalimang daog

CEBU, Philippines – Natuman ang pangandoy sa Ave Maria Sanctuary Park/USJ-R nga molubong sa ilang ikalima ka sunod-sunod nga daog pinaagi sa pagmakmak sa CSD Builders, 87-85 sa 1st M. Lhuillier Kwarta Padala Cup basketball tournament didto sa Pooc gym, dakbayan sa Talisay.

Naglawig na unta sa kadaugan ang CSD Builders dihang miugbok kini og sayes puntos nga bentaha, 83-77 sa nanghinapos nga bahin sa duwa, apan naungot ang ilang iskor dihang ang Ave Maria mipatuman og trapping defense.

Gumikan niini, ang CSD Builders nakahimo og upat ka sagunson nga turnovers nga naghatag sa Ave Maria og higayon pag-ilog sa bentaha, 85-83.

Natabla pa sa CSD Builders ang duwa, 85-all human sa basket ni Franklin Nailon sa katapusang nuybe segundos sa regulasyon, apan si Bobby Hatague mitusak sa iyang buzzer-beating fade-away jumper nga nakaluwas sa Ave Maria.

Si Hatague miposa og 14 puntos, apan si Armand Ponce maoy topscorer sa Ave Maria pinaagi sa iyang 16 puntos.

Ang Ave Maria ni team owner Raffy Senining pabiling nag-una sa overall standing sa ilang 5-0 nga baraha.

Si Luther Luke Justiniani miligwat og 15 puntos, samtang si Gabe Delfino mitimang og 11 puntos.

Ang naparot nga CSD Builders gipangulohan ni Jared Kane Abatayo, kinsa mi-ariya og 20 puntos, samtang si Nailon mihipos og 19 puntos. Si Aldrin Ocañada mitampo og 12 puntos alang sa CSD nga nagtabla karon uban sa San Remigio Beach Club sa managsamang 3-3 win-loss records.

Sa laing bahin, magtigi karon ang Chazyl Mae ug Binglens didto sa San Fernando Sports Complex.

Ang duwa sugdan sa alas-7 sa gabii.

Puntos Matag Usa

Ave Maria (87) - Ponce 16, Justiniani 15, Hatague 14, Delfino 11, Malinao 9, Lartoza 7, Gabas 7, Lapiz 6, Antigua 2

CSD Builders (85) - Abatayo 20, Nailon 19, Ocañada 12, De los Santos 10, Jaca 9, Abobo 7, Sereño 6, Sayson 2 – BANAT NEWS