Sibonga misanta sa nagkadinang daog sa Argao

CEBU, Philippines – Gisanta sa Sibonga ang lima ka sagunson nga daog sa league-leader Argao pinaagi sa pag-iskor og 120-116 sa overtime niadtong Biyernes sa gabii ubos sa Inter-Town category sa nagpadayong Mayor Edsel Galeos Cup basketball tournament 2009 didto sa President Diosdado Macapagal Sports and Cultural Center sa Argao.

Kompleto ang line-up sa Sibonga sa ilang pag-atake ug sukwahi sa host Argao nga kulang og players ang nakaingon sa ilang kapildihan. Bisan pa sa maong kapildihan, ang Argao mao gihapon ang lider sa liga sa ilang 5-1 nga baraha.

Sila si Noel Alima ug Roy Padilla maoy nangulo sa kadaugan sa Sibonga.

Gitabla ni James Bonachita ang duwa human siya makapasulod og three-pointer sa daginutong oras, 102-all aron paghatod sa duwa ngadto sa overtime. Apan ang Sibonga mi-outscore sa Argao, 18-14 aron makalingkawas sa kulbahinam nga duwa ug maangkon ang una nilang kadaugan sud sa tulo ka duwa.

Si Bonachita mi-iskor og tournament-high 40 puntos aron pangulohan ang Argao.
Sa laing duwa sa Inter-town division, milansang sa ilang unang daog ang Alcoy Miners human gilubong ang Dalaguete sa iskor nga 111-87. 

Sila si Joey Alvarado ug Ramil Antido maoy nangulo sa    Alcoy Antido nga miani og 22 puntos. Laing tulo ka teammates ang midugang og double figures alang sa Alcoy.

Ang Dalaguete gipangulohan ni Carlos Arias sa iyang 18 puntos.
Sa Inter-Zonal category, ang Poblacion-C nga gipaluyohan ni Edwin Figuez sa Petron, milubong sab sa Cup-J sa iskor nga 72-56, samtang ang Poblacion-B Looc Wrigglers naka-ipsot gikan sa mga kamot sa Upland Tigers bitbit ang 71-69 nga kadaugan. – BANAT NEWS