CEBU, Philippines - Mga mahiligon og extreme sports makasaksi na sab og laing kulbahinam nga aksiyon nunot sa pagpahigayon sa Barangay Babag I Atan Guardo Motocross showdown karong Domingo diha sa Barangay Babag.
Ang usa ka adlaw nga lumba adunay upat ka kategoriya -- ang expert, open, beginners ug pantra.
Gitukod nilang Renie Cabuenas ug Gil Vega, ang kompetisyon gipaluyohan ni businessman/sportsman Jonathan ‘Atan’ L. Guardo sa pakigtambayayong sa Uniherb Philippines, usa sa nag-unang health companies sa nasud nga tiggama sa nabantog na kaayong food supplements sama sa Arthro, Kidneycare, Diabet, Heartvit, Eyeberry ug Athan.
Mga ganting salapi ug mga tropeyo ang madawat sa mga top performers ning maong lumba nga gisuportahan sab sa Brgy. Babag I Youth Organization.
Alang sa dugang mga kasayoran, niadtong interesado mahimong motawag ni Cabuenas ug Vega sa numero 0910-822474. – BANAT NEWS