Demape bag-ong coach sa CIT Wildcats

CEBU, Philippines – Ang kanhi PBA player nga si Gilbert Demape maoy gitudlong bag-ong coach alang sa iyang alma mater nga Cebu Institute of Technology (CIT) Wildcats alang sa 2009 season sa Cebu Schools Athletic Association (CESAFI).

Mao kini ang gibutyag dinhi sa Banat News ni CESAFI commissioner Felix O. Tiukinhoy, Jr. sa miaging adlaw.

Si Demape maoy mopuli kang coach Alex dela Torre, kinsa mao na ang magsilbeng team consultant sa collegiate ug high school   teams.

Si Demape, nga taga-barangay Umapad, Mandaue City, maoy migiya sa Wildcats ngadto sa Cebu Amateur Athletic Association (CAAA) finals niadtong 1990's, apan napilde ngadto sa Cebu Doctors' College (nga karon CDU) Stallions ni coach Raul 'Yayoy' Alcoseba.

Samtang nagduwa pa siya sa high school, si Demape mao sab ang nangulo sa Wildkittens ngadto sa Zonal championships pinaagi sa pagpilde sa University of the Visayas (UV) Baby Lancers. Sila maoy nirepresentar sa Cebu alang sa National Inter-Secondary Basketball Championships didto sa San Pedro, Laguna.

Ang ilang kanhi coach mao si Romy Cal, kinsa mao na karon ang team consultant sa CSD Builders nga nagbase sa Toledo City ug head coach sa CSD Power Brokers.

Si Demape maoy leading scorer sa Wildcats sa iyang panahon uban nilang Robert Ortega, Joseph Caparida, Jumie Ararao ug Pedro Bacalso.

Gihangop sa CIT administration nga gipangulohan sa presidente niining si Gregorio Escario ang pagbalik ni Demape uban ang paglaum nga mahimo na silang competitive alang sa korona ubos sa iyang pagtimon.–BANAT NEWS