Hotel Fortuna/SWU Naglawig

CEBU, Philippines - Balanse nga opensa ug hugot nga depensa ang gigamit nga templada alang sa Hotel Fortuna/SWU Cobras aron usban ang Enervon/UC Webmasters pinaagi sa pag-iskor og 93-83 nga kadaugan sa Game 3 aron pagkuha’g 2-1 nga labaw sa ilang best-of-five championship series sa 3rd CESAFI Partner’s Cup human sa ilang sangka kaniadtong Sabado sa gabii didto sa Cebu Coliseum.

Busa, naglawig na sa ilang pagsaulog sa kampiyonato ang Cobras diin usa na lang ka daug ang ilang kinahanglan sa Martes atol sa Game 4 ug usa ka torneyo alang ngadto sa Singapore isip ganti ang gisaad kanila ni team owner Lorenzo “Chao” Sy, ang regional director sa Basketball Association of the Philippines (BAP).

Apan alang kang coach Dodie Miego sa Cobras, dili pa sila makapasalig nga ila nang matiwas ang Webmasters tungod kay aduna silay katakos pagtabla sa serye. Dihang gipangutana og makuha na ba nila ang korona karong Martes, si Miego igo lang mitubag “dili pa ta kaseguro ana kay basin motabla pa ang UC.”

Ang UC kanunay nga naggukod apan hinay-hinay kining mikamang aron pagsikit sa iskor 62-65 human sa triple ni Robinson Mohamad gikan sa left wing sa may 9:17 ang oras sa fourth quarter apan kalit mibawos si Eleazar Armecin og three-pointer aron pag-inat sa labaw sa Cobras ngadto sa sayis puntos, 68-62.

Wala madugay, gikarga na si Armecin sa stretcher dihang nahagsa kini human sa ilang pag-trangkahay ni Kevin Quilantang sa UC kinsa gitawagan og unsportsmanlike foul nga wala higustoi sa ilang bench nga masuk-anon kaayo tungod kay niadtong tungora, igo nalang silang nabiyaan og nuybe puntos ug taas pa kaayo ang oras, 70-79.

Sa kadugayan, na-fouled out ra usab ang 6-9 nga sentro sa UC nga si June Mar Fajardo nga nakapasamot sa kalisod sa UC gawas pa gud nga napugngan sila si Kelvin Juliane, Moncrief Rogado ug Edward Pao nga igo lang nagkumboya og 10 puntos kanilang tulo— singko puntos kang Pao, tres kang Rogado ug dos puntos kang Juliane.

Wala sab makadako’g bentaha ang UC bisan pa’g sayo kaayong nahimutang sa penalty situation ang Cobras sa may 7:30 ang nahibiling oras sa duwa ug bisan pa man tuod og nag-igo si Fajardo sa iyang free throws, kanunay sab kining masuklian sa Cobras sa ilang outside shots ilabi na sa mga tirada nilang Alfred Belande ug Eric Zanoria.

Si Belande kinsang triple naghatag sa Cobras og 11 puntos nga abante, 86-75 sa kataposang 3:35 sa duwa, maoy nangu sa Cobras sa iyang 23 puntos, si Zanoria midugang og 16 puntos ug si Armecin may 14 puntos.

Sila si Rene Pacquiao ug Eliud Poligrates mi-iskor og 12 ug 11 puntos alang sa Cobras.

Si Fajardo mihakot og 38 puntos aron pangulohan ang Webmasters samtang si Janssen Abella mi- iskor og 14 puntos.

Puntos kada usa:

Hotel Fortuna/SWU (93)—Belande 23, Zanoria 16, Armecin 14, Pacquiao 12, Poligrates 11, Jalandoni 4, Litorja 3, Pria 3, Gallarde 3, Divinagracia 2, Diango 1

Enervon/UC (83)— Fajardo 38, Abella 14, Mohamad 7, Pao 5, Quilantang 4, Agas 4, Luceño 4, Rogado 3, Juliane 2, Babad 2 Halftime: 42-36. - Gabby G. Malagar (BANAT NEWS)