Cebu City pabiling nag-una

CEBU, Philippines - Nagkahayag ang paglaum sa Cebu City Niños nga makapanalipod sa ilang korona dihang mihakot og 46 ka bulawan paghuman sa tulo ka adlaw nga aksiyon sa 2009 Central Visayas Regional Athletic Association (CVIRAA) Meet kagahapon didto sa Gov. Mariano F. Perdices Memorial Coliseum sa Dumaguete City.

Ang Cebu City Niños pabiling nagyaka sa labing taas nga posisyon sa overall rankings sa ilang 208 points, gisundan sa host-Dumaguete sa ilang 102 points ug Bohol nga adunay 89 points.

Sa elementary division, ang Cebu City Niños miposte og 97 puntos, gisundan sa Dumaguete pinaagi sa ilang 50 puntos ug Bohol sa ilang 31 puntos.

Sa secondary division, ang Cebu City Niños mirehistro og 111 puntos, gisundan sa Bohol nga adunay 58 puntos ug Dumaguete sa ilang 52 puntos.

Si Vlessica Jagna sa Cebu City maoy nanghawod sa 3,000, run sa oras nga 11 minutos ug 29.57 segundos. Gidominar sab sa 13-anyos nga si Jagna ang 800m ug 1,500m ug maoy giila karon isip reyna sa long distance running.

Si Jagna nakig-uban ni Carl Jeanette Malazarte, kinsa naghari sa steeplechase event sa oras nga 10 minutos ug 37.71 segundos. Laraw ni Malazarte nga mokabkab og bulawan sa 5,000m run karong adlawa.

Human maghari sa 100m hurdles, si Jee Ann Racoma nikulit sab og daog sa 200m run sud lang sa 27.18 segundos, mitunol sab og bulawan si Clint John Pila pinaagi sa 400m hurdles sa oras nga usa ka minuto ug 1.60 segundos.

Didto sa Dumaguete City High School Gym, ang Cebu City miharos og hakot sa bulawan sa dancesport competition.

Sa elementary class, sila si James Bryan Camachu ug Christine Camachu maoy nanghawod sa modern standard, samtang sila si Clyde Pinili ug Arielle Rendon mao sab ang nanghawod sa Latin American action.

Ang paresan nilang Jan Kristoffer Rodis ug Ellise Plaza maoy naghari sa modern standard sa secondary division, samtang ang Latin American title napunta nilang Lloyd William Bellingan ug Justhel Kate Tabanag.

Sa arnis, ang Cebu City midaog og upat ka golds, duha gikan ni Zenneth Pacible sa boys featherweight ug individual double-stick events. Ang laing duha ka bulawan gihatag nilang Donnie Aguhob ug Steven Sean Quinañola, kinsa nanghawod sa boys extra light weight ug individual single stick.

Sa laing bahin, ang Mandaue City, mihakot og pito ka bulawan kagahapon kortesiya sa arnis, archery ug athletics.

Si Fiona Marie Mendoza mikabkab og duha ka bulawan sa single ug double stick events, samtang si Donald Comendador Jr. ug Angel Aguanta nidaog sa bantamweight category.

Mihakot sab og duha ka bulawan si Christian Mae Guido sa archery human manghawod sa 30m and 1/2 FITA (50m/30m) secondary girls, samtang si Daniel Noval mihatag sa ikapitong bulawan sa Mandaue sa 200m run sa oras nga 22.63 segundos. – BANAT NEWS