CEBU, Philippines - Sa labing unang higayon, ang Ilocos Sur Bravehearts manulong dinhi sa Sugbu aron sukdon ang abilidad sa defending National Champion M. Lhuillier-Cebu Niños sa Game-1 sa ilang “best-of-five” quarterfinal series sa 2009 Smart Liga Pilipinas Conference II ugma diha sa University of San Carlos (USC)-main gym.
Sa una nilang engkuwentro niining conference, ang Cebu Niños naka-eskapo gikan sa mga kamot sa Bravehearts sa iskor nga 87-84 niadtong Enero 28 didto sa Santo Domingo People’s Center sa Ilocos Sur.
Ang duha ka teams subli na sab nga mag-abot, tulo ka adlaw human makuha sa Cebu Niños ang Third Place.
Saligan sa Bravehearts ni Gov. DV Savellano ug coach Gino Manuel mao ang ilang mga higanteng sila si Nat Cruz, Alain Musni ug Christian Cabatu, forwards Christopher Baluyot, Christ Santos ug Elbert Alberto ug guards Ismael Junio, Marvin Yambao ug Boyet Bautista.
Mikompleto sa komposisyon sa Bravehearts mao sila si forward Junar Arce ug Edbert Ton ug guards Aaron Galapon, John Valderama ug Michael Gonzales.
Ang Bravehearts nikuha og unom ka daog sa ilang 16 ka duwa sa Tour Phase, uban ang ilang pagdaog sa Quezon Leg niadtong Pebrero 7. Nitapos sila sa Second Place sa General Santos City ug nangiwit sa Taguig City ug sa Ilocos Sur.
Sa laing bahin, ang Game-2 sa quarterfinal series tali sa Trace-Laguna Stallions ug Smart-Pampanga Buddies duwaon karon didto sa Trace College Gym sa Los Baños, Laguna.
Ang duha ka teams padayon pa nga nagkumbati sa Game-1 ning pagsulat.
Ang National Playoffs nahimo tungod sa suporta sa Smart, ML Kwarta Padala, Air21, Accel, Burlington, Laptop Phoneshope Exchange, Nature’s Spring Water ug Molten uban sa pagtugot sa Samahang Basketbol ng Pilipinas (SBP). – BANAT NEWS