Sitio Colveta mibawos

CEBU, Philippines – Mibawos ang Sitio Colveta ngadto sa nakapilde nila nga Conor Express Freight Forwarders ni team owners Olivia Paraguas ug Elmer Hamis, 66-62 sa ilang knockout match pag-abante sa finals sa nagpadayon nga Better-Run Basketball Association (BERBA) tournament niadtong Domingo didto sa Ma. Gochan Sports Complex sa brgy. Mambaling.

Milabaw ang Conor og dos puntos 36-34 sa halftime pinaagi sa mga paningkamot nilang Egang Tabalin ug Dave Unabia. Apan ang Conor kalit lang namugnaw sa third period dihang gipahugtan sa Colveta ang ilang depensa. Nailog sa Colveta ang labaw sa iskor nga 53-48 pagsugod sa final quarter.

Nagpuli-puli og ilog sa labaw ang duha ka kampo sa fourth quarter hangtod nga nakuha sa Colveta ang momentum sa daginutong oras sa duwa.

Ang power forward nga si Walas Vergara maoy nangu sa Colveta pinaagi sa iyang 21 puntos.

Sa sayo pa, ang inilog nga Vernel Aroma Therapy nga gipangulohan ni Danny Duran maoy unang nisakmit og luna sa finals dihang ilang gipilde ang Left Over, 105-92.

Ang Colveta ug Vernel mag-abot karong Domingo alang sa finals.

Si Cito Campos miburak og 25 puntos aron pangulohan ang Vernel, samtang si Dodong Lopez midugang og 16 puntos.

PUNTOS MATAG USA

Unang duwa:

Vernel (105) - Campos 25, Lopez 16, Arias 14, Villarta 12, Dimitiman 2, Martillan 2

Left Over (92) - Millior 18, Llamdao 14, Salasa 12, Fernandez 11, Cabreros 10, Manguinsay 7, F. Cañete 7, Calvo 6, V. Cañete 3, Valle 2, D. Cañete 2

Ikaduhang duwa:

Colveta (66) - Vergara 21, Tradio 12, Macion 9, Rentuma 6, Fernandez 6, Abrera 3, Zandry 3, Sega 2, Garcia 2, Paez 2

Conor (62) - E. Tabalin 19, Unabia 13, Ledesma 8, P. Tabalin 6, Romeo 4, Suerte 4, Pumareja 3, Capacite 2, Albaño 2, Ocañada 1  (BANAT NEWS)